Os sindicatos piden á Xunta que absorba o hospital para dar estabilidade a empregados e usuarios
30 sep 2019 . Actualizado á 18:02 h.A incredulidade apoderouse onte da maioría do persoal de Povisa, segundo recoñecen varios dos seus membros, ao ler neste xornal que a venda do hospital a un grupo controlado desde Estados Unidos está practicamente pechada. A incerteza é enorme. Nalgúns casos, tamén a indignación, porque a dirección da empresa non transmitiu ningunha información ao persoal nin aos seus representantes sindicais, segundo coinciden CIG, CC. OO., SGPS e Unenf.
«Parécenos indignante decatarnos pola prensa»
As voceiras dos catro sindicatos lembran que hai apenas dúas semanas o comité de empresa mantivo unha reunión coa dirección de Povisa e que nela, a representante da CIG preguntoulle ao conselleiro delegado se o hospital estaba en venda. «Dixo que non», confirman os catro. Hoxe mesmo esixirán información oficial. «Parécenos indignante decatarnos pola prensa de que o hospital está a piques de venderse cando o artigo 64 do Estatuto dos Traballadores obriga á empresa para ternos informados como comité», quéixase o representante de Comisións Obreiras, Xurxo Cabral. Pide que se dea información para tranquilizar ao persoal.
«Este hospital ten que absorbelo ou Sergas, para darlle estabilidade á persoal e aos usuarios»
A delegada da CIG, María Jesús Neira, vai máis lonxe. «Este hospital ten que absorbelo ou Sergas, para darlle estabilidade á persoal e aos usuarios, e acabar coa incertidume e a precariedade laboral», propón. Ata o de agora esa opción nunca estivo sobre a mesa de Sanidade, pero tamén é certo que a situación nunca fora a actual. «Confirmar a venda é unha mala noticia. Xa dixemos en decembro que ía pasar algo que sería bo para vos propietarios e malo para nós. Non equivocámonos», lamenta. Neira teme que o desembarco do xigante norteamericano Centene supoña axustes no persoal.
Tamén Ruth Vallejo, do SGPS, recoñece a incerteza no persoal por este movemento e pide que se garanta o emprego. «Son escéptica, porque a dirección tamén nos dixo que asinaran o mellor concerto posible co Sergas e que logo era o peor; que economicamente ían ben e logo que ían mal...».
Por parte de Unenf, Conchi Sánchez pide claridade á dirección da empresa. «Moitas veces hai habido rumores de venda, queremos que nos informen».
O comité preguntou ao dono hai dez días se pensaba vender o centro e díxolles que non.