Trasladaranse desde A Coruña, onde residen, cos seus fillos de 2, 4 e 6 anos
24 jul 2019 . Actualizado ás 05:00 h.A oferta lanzada fai un par de semanas polo concello lucense de Trabada (1.121 habitantes), de casa e emprego para as familias que escolaricen no colexio local a dous nenos de 3 a 6 anos, xa ten aos seus primeiros elixidos. Trátase dunha parella nada en Senegal e residente na Coruña desde hai 13 anos, que ten tres fillos de 2, 4 e 6 anos. Dous deles xa foron matriculados no CEIP local, para contribuír ao obxectivo de conseguir un número de alumnos suficiente (faltan dous máis) para que non peche a aula de Infantil.
Segundo explicou a alcaldesa de Trabada, Mayra García, o pai de familia ten traballo no sector da hostalería ata agosto, de modo que posporán o traslado a Trabada ata setembro. A súa elección foi froito dunha entrevista persoal, hai uns días, coa propia rexedora, a directora do CEIP e a traballadora social: «Valoran o feito de estar nun pobo tranquilo e impresionáronlles as instalacións deportivas», manifestou a rexedora socialista.
Agora, desde o Concello de Trabada buscarán un emprego que se adapte ao perfil laboral do pai de familia, que xa traballou en sectores como a construción, agricultura ou en estaleiros. Para iso enviarán o seu currículo ás empresas locais que se ofreceron a contratar a quen acudan a vivir a Trabada.
De momento unha trintena de familias de diferentes puntos de España puxéronse en contacto co Concello para explorar a posibilidade de emprender unha nova vida no municipio lucense. «Seguimos con entrevistas e esperando a que nos manden os currículos para ver de contratalos, que é a maior preocupación das familias que se propoñen vir vivir a Trabada», apuntou Mayra García.
Xa hai firmes candidatos para ser elixidos como a segunda familia con dous fillos de 3 a 6 anos que sería preciso matricular para que non peche a aula de infantil: «Si vai dar tempo, porque hai varias familias que cumpren», concluíu a alcaldesa.
