O 16 % de inscritos pasou á segunda fase da oposición
16 jul 2019 . Actualizado ás 11:18 h.O que empezou sendo unha carreira con 9 aspirantes por cada praza xa baixou a un candidato e medio para cada un dos 2.064 postos ofertados nas oposicións de educación deste ano en Galicia. Dos case 18.800 inscritos nas probas pasaron á segunda fase pouco máis de 3.000. É dicir, o 16 % de quen se apuntaron continúa no proceso tras superar a primeira proba celebrada o pasado 22 de xuño. Na convocatoria do ano pasado apenas o 10 % aprobaran o primeiro exercicio.
Desde academias preparatorias como Premir ou Nós din ter notado ese aumento no número de aptos en primeira fase, pero lembran que a situación difire de xeito notable segundo a especialidade. «Hai algunhas ramas nas que pasaron á segunda proba menos persoas que prazas hai ofertadas», explica o preparador Roberto Rey. No que toca a secundaria, por exemplo, a especialidade de formación e orientación laboral ofrece 60 prazas, pero continúan no proceso apenas 40 candidatos. O mesmo sucede con Administración de Empresas, con pouco máis de 40 aprobados para 50 prazas, ou en Economía, con lixeiramente menos aprobados que postos ofrecidos (65). «Iso non quere dicir que sexa máis fácil aprobar a segunda fase, como erroneamente pensan algúns opositores. Se a un tribunal non lle treme o pulso suspendendo no primeiro exame tampouco ten por que ser máis xeneroso agora. Non é obrigatorio que o número de aprobados complete o número de prazas», explica Rey .
A nivel global, o número de candidatos a unha praza de mestre de primaria aínda duplica ao de vacantes (770 prazas para 1.684 opositores convocados á segunda proba). En secundaria son 1.176 os candidatos que seguen na loita por facerse con algunha das máis de mil prazas (834 de acceso libre e 276 de promoción interna). Respecto dos candidatos a profesor nas escolas oficiais de idiomas galegas, pasaron a primeira proba 48 aspirantes a 30 prazas. Os que non se cubrirán son os 138 postos de profesores técnicos de formación profesional, xa que nesta categoría superaron o primeiro corte só 126 persoas.
Segunda proba
Os 3.034 opositores que chegaron á segunda fase do proceso selectivo xa están a se enfrontar estes días ás probas nos distintos tribunais repartidos polas cidades galegas. Se os primeiros exercicios realizados en xuño tiñan por obxecto demostrar os coñecementos específicos da especialidade docente á que se opta, agora é o momento de avaliar as aptitudes pedagóxicas dos aspirantes.
Aínda que con certas diferenzas segundo a especialidade, a segunda proba consta de dúas partes. Na primeira, o candidato debe expor unha programación para todo un curso escolar composta por varias unidades didácticas, que o examinado elaborou previamente e que entrega ao tribunal unha vez aprobou a primeira fase. A segunda parte consiste en desenvolver e defender de xeito oral unha unidade didáctica. O día da exposición realízase un sorteo e extráense tres unidades relacionadas co temario oficial da especialidade. De entre elas, o opositor escollerá unha para expola ante o tribunal. En total, a proba dura ao redor dunha hora e pode incluír un pequeno debate cos membros do grupo avaliador.
O gran temor: quedar en branco
Precisamente o carácter oral desta segunda proba é unha das preocupacións de quen lograron avanzar no proceso selectivo. «Non quedar en branco, expresarme ben, transmitir o que quero dicirlles e que non noten o meu nerviosismo é o que máis me inquieta», conta Isabel, que aspira a unha praza en secundaria pola especialidade de Física e Química e que leva preparando a fondo a cita desde antes sequera de saber se aprobara o primeiro exame. Mesmo pediu prestadas aulas de institutos e asociacións para ensaiar de xeito máis realista a súa exposición.
A semana tamén foi intensa para Jorge, candidato por Xeografía e Historia, ao que o seu apto no primeiro exame colleu por sorpresa. «Non teño a segunda parte tan preparada como me gustaría, hai moito que mirar, teño a mesa chea de papeis. Están a ser días intensos, de durmir pouco e comer mal», explica. Cre que a exposición é a parte máis difícil do proceso selectivo «por ser diante do tribunal con tan só un folio como apoio». Pola contra, Manuel, o seu compañeiro de especialidade, asegura que lle tiña máis medo á proba escrita «porque é máis difícil pasala».
Os tres enfróntanse por primeira vez á parte oral das probas, algo que non conseguiu Sabela, que oposita a mestra, e que non logrou pasar á segunda fase: «O ano pasado sentoume peor non aprobar pero como este curso polo menos xa estou nas listas para substitucións tómomo con máis filosofía. Esta oposición é unha carreira de fondo», di animosa.