Mañá nevará por amais dos 1.000 metros nas zonas de montaña de Lugo e Ourense con acumulacións importantes
12 dic 2018 . Actualizado ás 17:37 h.A situación meteorolóxica vaise complicar en Galicia nas próximas horas. Unha fronte deixará choivas xeneralizadas e ventos do sur que irán aumentando en intensidade ata acadar intervalos moi fortes de cara á próxima madrugada. Ademais hai temporal no mar, con aviso laranxa que comezará esta tarde no oeste da Coruña e que mañá xa afectará a todo o litoral galego. En todas as zonas se agarda mar combinado do oeste con ondas de 5 a 6 metros.
A Aemet activou ademais a alerta amarela a partir das nove desta noite e ata as seis da madrugada de mañá por ventos intensos de ata 80 quilómetros por hora nas provincias da Coruña e Pontevedra, na Mariña, e nas zonas de montaña de Lugo e Ourense.
Ante esta situación de alerta laranxa no litoral galego a Xunta recomenda a suspensión das actividades pesqueiras e marisqueiras como medida de precaución naquelas zonas máis perigosas. Tamén se recomenda que se extremen as medidas de seguridade á hora de realizar calquera actividade no mar e que se revisen os cabos e os amarres das embarcacións.
Aconsella evitar os paseos polas instalacións portuarias, en especial naquelas zonas de especial perigo como os diques de abrigo ou escaleiras de acceso. Tamén se desaconsella aparcar nos portos, na medida do posible.
Tras pasar a fronte esta madrugada, mañá xoves será unha xornada de chuvascos con saraiba e aparello eléctrico na comunidade galega. A cota de neve situarase pola mañá nos 1.000 metros, subindo a 1.300 pola noite, segundo as previsións de Meteogalicia , con alerta amarela para as montañas de Lugo e Ourense por acumulacións de neve por amais dos 5 centímetros.
A alerta laranxa en todo o litoral se manterá ata as primeiras horas do venres.