Rosa María Costoya: «Galicia está de moda agora mesmo, a xente vén buscando tranquilidade»
GALICIA
Hai 13 anos que Mark Adkinson, un británico de Manchester namorado de Galicia, fundou Galician Country Homes
09 dic 2018 . Actualizado ás 05:00 h.Hai 13 anos que Mark Adkinson, un británico de Manchester namorado de Galicia, fundou Galician Country Homes, unha axencia inmobiliaria dedicada á venda de casas rústicas, pazos e aldeas por toda a comunidade, con sede na localidade de Rábade (Lugo). Á fronte do negocio está actualmente Rosa María Costoya, a muller de Adkinson. Aínda que a súa oferta se dirixe a un amplo e variado mercado, os clientes estranxeiros constitúen a gran maioría.
-Son un negocio moi especializado, que tipo de clientes teñen?
-Moi diversos e con propósitos diferentes. Esta semana, por exemplo, recibimos a unhas persoas de Manchester interesadas nunha aldea que ofertamos. O seu propósito é habilitar nela un lugar de descanso, con prestacións de diverso tipo. Hai uns días tamén acudiron un afgán que reside coa súa muller no Canadá e tivemos a un canadense que está casado cunha xaponesa. A quen veñen ensinámoslles o ben que se vive en Galicia. Algúns acoden porque queren abrir un negocio e outros, porque desexan un lugar para descansar.
-Polo que explica, o seu negocio ten unha gran actividade.
-Cada día son máis os estranxeiros que veñen porque viron as nosas ofertas e queren coñecelas de primeira man. A quen acoden ensinámoslles o ben que se vive en Galicia. Ademais, conto cunha rede de colaboradores en distintos lugares de Galicia. Persoas que traballan no sector inmobiliario e que dan a coñecer a nosa oferta.
-Existe un crecente interese por parte de cidadáns estranxeiros por adquirir propiedades aquí?
-Galicia está de moda agora mesmo, a xente vén buscando tranquilidade. Agardo que saibamos custodiar esta terra para que non cambie. Quen acoden aquí comproban a calidade da comida, da auga, dos espazos naturais e observan que é un lugar apracible, con xente moi amable. Os estranxeiros que acoden a Galicia buscan cousas distintas aos que se decantan polo sur de España.
-Como conseguen unha oferta de vivendas tan específica?
-Actualmente a xente coñécenos e veñen para que poñamos en venda propiedades familiares, casas rústicas, pazos. Ás veces son persoas que herdaron a propiedade e non se poñen de acordo ou que vivían na zona rural marcháronse. Queren que estes inmobles poidan ter novos usos ou que en aldeas que quedaron despoboadas poida xerarse vida.