No primeiro semestre do ano realizáronse 110.000 operacións, máis da metade ambulatorias
21 jul 2018 . Actualizado ás 05:00 h.O Sergas anunciou onte que segundo o seu balance do primeiro semestre do ano, o tempo de espera para unha operación está por baixo dos 60 días de media por primeira vez, obxectivo que recolle a Lei de Garantías de Prestacións Sanitarias. Díxoo o xerente do Sergas, Antonio Fernández-Campa, quen lembrou que se o enfermo sofre un proceso de máxima gravidade, cualificado como prioridade 1, o tempo que debe agardar baixa considerablemente e sitúase xusto por baixo dos 15 días. O responsable do servizo sanitario galego recalcou que a situación do sistema autonómico é moito mellor que a media estatal, que se sitúa en 106 días de espera.
A normativa galega de atención sanitaria, aprobada en decembro do 2013, tamén contempla un máximo de 45 días para as primeiras consultas externas e 45 días para as primeiras probas diagnósticas ou terapéuticas en atención sanitaria hospitalaria programada e non urxente. Neste sentido, as cifras do primeiro semestre do ano son diferentes: 37,3 días para a primeira consulta e 59 días de espera media para a primeira proba, por amais aínda das previsións do Sergas, pero dez días menos que no mesmo período do ano anterior.
Consultas telefónicas
A actividade nos hospitais e centros de saúde galegos é intensa, e neste semestre víronse 108 patoloxías diferentes. De xaneiro a xuño, houbo 13,4 millóns de consultas en atención primaria, das que 1,4 foron telefónicas, un sistema cada vez máis utilizado polos pacientes (140.000 máis este ano) pola súa eficacia e rapidez para procesos de menor intensidade.
Radiografías, o máis habitual
En canto ás consultas hospitalarias, este último semestre rexistráronse case 2,8 millóns. Estas supuxeron 1,6 millóns de probas diagnósticas, que son case 126.000 máis que o ano pasado, e 110.374 intervencións.
Dos 26 tipos distintos de probas diagnósticas realizadas nos hospitais, a maior parte foron radiografías e ecografías, nada menos que o 61 % do total: 658.747 para a proba tradicional (40 % de todas as realizadas) e 232.510 para a proba por son. A estas súmanse, xa a gran distancia, outras probas diagnósticas: TAC, que foron 117.761, o que supón o 7 % xeneral; unha suma de 61.243 endoscopias (3,7 %) e algo máis da metade (37.367) de resonancias magnéticas, que son o 2,3 % das probas practicadas.
Hai cambios importantes entre o tempo que se agardaba o ano pasado pola realización destes procedementos fronte ao que se necesitou neste exercicio. Por exemplo, unha ecocardiografía esixía 93 días e agora faise nunha media de 50 (43 días menos) ou a ecografía vascular, que pasou de 80 a 52 xornadas. Claro que non en todos os grupos a variación é así de positiva. A ecografía ginecológica tarda máis que antes (de 44 a 58 días) e a de mama (que non mamografía) tamén (de 55 a 67).
Intervencións
En canto ás operacións que se realizaron en Galicia no que levamos de 2018, máis da metade foron ambulatorias, o que repercute nunha mellor recuperación do paciente, xa en casa. Obviamente, a chamada cirurxía sen ingreso só se realiza en determinados procedementos. No caso galego foron 59.000 nestes meses, fronte aos 51.300 que esixiron que o enfermo quedase no hospital. Case todos, iso si, estaban programados: ocorreu en 93.413 ocasións, que supoñen o 85% do total; o resto das veces, practicamente 17.000, a intervención tivo carácter urxente.
Segundo Antonio Fernández-Campa, os datos indican que máis do 98 % dos pacientes atendidos fórono nos tempos garantidos polo Sergas.
Sete cancros xa son atendidos en menos de 5 días, a chamada vía rápida
Se a primeira consulta dun especialista no hospital esixe agardar unha media de 37 días, pode acurtarse a menos de cinco se o médico de cabeceira sospeita que se trata dun destes sete cancros: mama, colon, pulmón, próstata, vexiga, cabeza e pescozo e melanoma. Nese caso, a primeira consulta hospitalaria é inmediata (na cabeza e pescozo cunha media de 1,8 días de espera e en mama, 2,7) ou como moito se alonga aos 6,8 días se se teme que sexa un tumor de colon. Unha vez no servizo correspondente, están protocolizadas unha batería de probas para que no prazo de quince ou vinte días o paciente xa teña un diagnóstico e de feito comece o tratamento que lle corresponda. No primeiro semestre as vías rápidas tiveron 8.334 pacientes.