O anticiclón non entrará esta semana coa forza que se prevía; o norte terá máis nubes e pouco máis de 20 graos, mentres que o sur podería superar os 25
08 jul 2014 . Actualizado á 14:48 h.Tres fins de semana consecutivas de mal tempo e o cuarto é, de momento, unha incógnita. As previsións que apuntaban a que as altas presións entrarían con forza en Galicia desde onte desinfláronse e de momento a semana terá un tempo parecido ao verán, pero sen moita calor, sobre todo no norte, e con incursións puntuais de borrascas, que complicarán a atmosfera.
Juan Taboada, de Meteogalicia, deixa claro que «esta fin de semana non a vai ser tan malo como os últimos dous». A continuación, destaca que «non está moi claro» o que pasará o domingo, cando podería pasar unha fronte pouca activa. Hoxe tamén se notará no norte a influencia da zona de aire frío situada en Irlanda.
Explica Taboada que é esta perturbación a que está a complicar o tempo nas primeiras semanas do verán: «Mentres siga a zona de aire frío en Irlanda e Escocia, o anticiclón non pode entrar con forza». Cando se irá? O meteorólogo afirma que «parece que de momento esta semana e a principios da próxima manterase, aínda que isto pode cambiar dun día para outro».
Neste contexto estes días non serán de excesiva calor, máis ben de valores suaves no norte, polo menos ata o venres. «Van ser días nos que hai que aproveitar os intres en que haxa sol, aproveitar o día a día», di.
A situación de mal tempo rexistrada desde o inicio do verán non fixo de momento saltar as alarmas. «Se a segunda quincena de xullo, vén de moita calor, cando se fagan as estatísticas do mes, este xullo pasará á historia meteorolóxica como normal, con todo, a sensación que se ten agora mesmo non é esa», destaca. O experto matiza que o feito de que se encadearon tres fins de semana de tempo malo «psicoloxicamente afecta».
Santiago Pemán, home do tempo durante 25 anos na pequena pantalla, móstrase cauteloso e posterga ata o 16 de xullo a chegada definitiva do tempo seco.
Diferenzas entre norte e sur
Serán especialmente as provincias do norte, e máis concretamente a da Coruña, as que menos sensación de verán teñan hoxe e mañá, xa que non se prevé superar os 22 graos. Os ceos estarán máis despexados en Pontevedra e Ourense e fará máis calor.