O obxectivo deste programa, de case 15 millóns de euros, é que aumente o peso das empresas emerxentes na economía galega
19 oct 2022 . Actualizado ás 05:00 h.Baséanse na innovación, son empresas emerxentes, teñen un alcance xeográfico ambicioso e normalmente detrás están mozos emprendedores que souberon atopar un novo mercado. Son as start-ups, un modelo que crece nos últimos anos e ao que a Xunta de Galicia non está disposta a renunciar. Por iso, a reunión semanal do equipo de Alfonso Rueda avaliou fai tan só uns días a nova Axenda Start-ups Galicia 2022-2024 cunha aposta clara, reforzar un ecosistema que conjugue a iniciativa empresarial coa innovación. E é que practicamente ningún sector produtivo pode renunciar agora mesma a esta innovación, polo que o Goberno galego quere que esta axenda sexa «un motor de reforzo da modernización e diversificación da economía de Galicia».
Este paquete de medidas suma case quince millóns de euros, 14,7 en concreto, co fin de crear un centenar de empresas e acelerar 200 start-ups nos próximos dous anos, mellorando así a capacidade competitiva da comunidade galega. A axenda favorece o crecemento das empresas de base tecnolóxica e fomenta a creación de riqueza e emprego. As previsións deste proxecto son pór en marcha 600 postos de traballo vinculados ás novas empresas, e facilitar unha facturación agregada destas compañas emerxentes de 70 millóns de euros neste período.
A Axenda estrutúrase en liñas diferentes, con doce medidas e 28 actuacións que viran sobre dous eixos: un, centrado de forma específica nas start-ups, e outro de medidas de promoción do ecosistema innovador. O primeiro dos eixos aglutina programas de apoio a estas entidades doutros organismos e programas da Xunta para crear un mapa completo de medidas incentivadoras. Entre elas, a posta en marcha de . business factoriesSon aceleradoras verticais nas que os emprendedores poderán atopar apoio e os medios necesarios para desenvolver as súas ideas e levalas ao mercado.
Estas aceleradoras céntranse en sectores concretos, e a Xunta quere pór en marcha algunhas que respondan as tendencias actuais para a transformación tecnolóxica do sector alimentario (foodtech), da saúde (healthtech), do campo da bioloxía (biotech), a loxística ou as cadeas de subministración. De feito Galicia xa conta cun mapa de aceleradoras creado estes anos ao redor da alimentación, a automoción, a aeronáutica, a saúde, a biotecnoloxía ou mesmo unha incubadora de alta tecnoloxía para a automoción que completa á propia business factory deste sector.
Procura de investidores
Outra das novidades desta axenda é a procura do investimento privado. O programa da Xunta quere captar investidores para potenciar a colaboración público-privada nas start-ups galegas. Isto farase a través do novo programa Coinviste con XesGalicia, atraendo a socios con acreditada solvencia económica, con capacidade tractora e cunha adecuada especialización en base tecnolóxica.
Mercado exterior
A chegada destes investidores pode axudar á internacionalización das compañas, clave neste tipo de empresas emerxentes, pero a iso tamén contribuirá o programa Erasmus Start-up, cuxo obxectivo é conectar emprendedores no ámbito internacional a través da participación de empresas emerxentes galegas en iniciativas que levan a cabo noutros países. O segundo eixo da axenda presentada pola Xunta pretende fomentar un ecosistema innovador na comunidade galega, mellorando por exemplo as condicións na contorna feminina para facilitar que leven a cabo os seus proxectos e tamén no ámbito rural, neste caso reducindo as barreiras fronte ao medio urbano. Respecto ao impulso a iniciativas promovidas por mulleres, destaca unha nova liña enfocada á captación de emprendedoras que desenvolvan en Galicia proxectos centrados en retos tecnolóxicos e territoriais específicos.
Este modelo contribuíu a crear 153 empresas
O que quere a Xunta de Galicia con esta axenda é que a comunidade non quede atrás na innovación e que o tecido produtivo sexa máis competitivo en relación a outros mercados. Refórzase polo tanto con estes programas unha actividade que xa leva sendo obxectivo do Goberno galego nos últimos anos. En concreto, en seis anos apoiouse e acelerado a través das distintas aceleradoras sectoriais a máis de 320 empresas, contribuíndo á creación doutras 153 compañas innovadoras.
Isto supón xerar riqueza e emprego, na súa maioría de alta cualificación pola tipoloxía destas entidades. Ao longo de seis anos se implementaron 900 novos postos de traballo. A iso hai que sumar o traballo de XesGalicia, que suma actualmente máis de 34 millóns de euros do seu patrimonio asociado a con start-ups, case 80 entidades en carteira e máis de doce millóns de euros de fondos dispoñibles para levar a cabo investimentos nesas compañas emerxentes.
Hai pouco máis dun decenio case nin se falaba delas pero as aceleradoras son agora unha realidade en España. Hai centos e moitas pugnan por atraer aos mellores emprendedores. Aínda que o seu tamaño, os seus investidores e os sectores aos que se dedican varían, a filosofía é a mesma, acompañar ás start-ups con apoio e mentorización, buscando o mellor modelo de negocio para cada proxecto innovador e mesmo axudando a atopar fondos.