A Xunta colabora con 12,2 millóns para que Stellantis Vigo teña unha gama completamente electrificada en 2025
GALICIA INNOVA
Cun investimento total de 22,3 millóns, Facendo 4.0 é un proxecto orientado ao desenvolvemento da fábrica do futuro, que inclúe unha ambiciosa estratexia de electrificación de cara ao próximo lustro e prevé a creación de 50 postos de traballo
21 oct 2021 . Actualizado ás 20:11 h.O vicepresidente económico e conselleiro de Economía, Empresa e Innovación, Francisco Conde, destacou o alcance do proxecto que lidera Stellantis Vigo xunto con CTAG, Aimen, Gradiant e a Universidade de Vigo, para seguir avanzando no vehículo eléctrico, que conta cunha achega da Xunta de 12,2M€ no marco do programa Fábrica Intelixente e Sostible. Facendo 4.0 é dunha iniciativa, cun investimento total de 22,3 millóns, que está orientada ao desenvolvemento de procesos, produtos e sistemas que dirixan a factoría viguesa cara á fábrica do futuro e que inclúe unha ambiciosa estratexia de electrificación de cara ao 2025. En leste proxecto sete pemes galegas e permitirá a creación de 50 postos de traballo.
A través do programa Fábrica Intelixente e Sostible da Axencia Galega de Innovación (Gain), a Xunta achega un 54% do investimento previsto. Un programa do que xa se convocaron catro edicións nas cales se apoiaron 24 proxectos en diferentes sectores que mobilizaron investimentos por valor de 272 millóns.
Conde subliña que a automoción é un sector no que se fai efectiva a transferencia de coñecemento a toda a cadea de valor polo peso que ten esta industria no conxunto da economía galega, un 15% do PIB, que é o que desencadea ese efecto tractor. Segundo dixo, a transferencia de coñecemento é unha constante que fai da automoción galega, co Grupo Stellantis á cabeza, un referente en innovacións relacionadas co vehículo do futuro: eléctrico, autónomo e conectado.
O vicepresidente económico puxo de relevo o traballo feito polo sector neste ámbito e asegurou que, en consecuencia, neste contexto de transición cara a unha industria máis dixital e sostible non parte de cero. Parte como número uno en produción en toda España, apuntou, pois preto dun 22% do que produciu esta industria en 2020 a nivel nacional corresponde á planta de Vigo.
Conde destacou a visión de unidade coa que o sector está afrontando o contexto actual, tal e como queda reflectido no proxecto AutoAncora. E, respecto diso, volveu insistir en que Galicia está aberta ao diálogo para defender que esta iniciativa sexa incluída no Perte da automoción, porque é clave para manter a competitividade do sector en Galicia.