Mozos formados na EUDI de Esteiro comandan firmas que despuntan no sector da fabricación aditiva
26 oct 2019 . Actualizado ás 10:31 h.Din que as grandes empresas de Sllicon Valley naceron nun garaxe. E foi ese mesmo lugar, un garaxe, pero das Pontes, onde fai xa sete anos, Álvaro Rey Rodríguez, un alumno recentemente saído das aulas da Escola Universitaria de Deseño Industrial (EUDI) de Ferrol, tivo o seu primeiro flechazo cunha impresora 3D. «Cando vin aquela máquina quedei alucinado e díxenme: teño que facerme cun cacharro como este sexa como sexa», conta botando a vista atrás. Pouco despois conseguiu reunir os 300 euros que lle custou o seu primeiro «cacharro» importante e foi así como no 2013 puxo en marcha MakerGal, un negocio que seis anos máis tarde converteuse nunha exitosa empresa dedicada ao deseño e distribución de impresoras 3D de selo propio, como a Mendel Max XL e a P3steelV4, ademais de impartir cursos de formación e realizar todo tipo de traballos de prototipado e modelado 3D.
Pero Álvaro Rey non é o único titulado da EUDI que agora despunta neste campo. Xuntos a outros dous novos socios, o ferrolán Roberto Regos e os coruñeses Iago Iglesias e Carlos López -que tamén se formaron no centro do campus- fundaron hai apenas dous anos ITFAB, unha firma dedicada á impresión de obxectos en 3D tanto para particulares como para empresas (algunha das súas pezas hanse utilizado para a montaxe de tendas de Inditex), que tamén destaca polo seu compromiso ambiental, investigando os posibles usos dos refugallos plásticos como materia prima para os seus produtos de fabricación tridimensional. «Temos que ir cara a unha economía circular», reivindica Iago Iglesias .
Da traxectoria de ITFAB e MakerGal puideron coñecer moitos máis detalles os asistentes á Xornada Formativa de Fabricación Aditiva da UDC, que onte se celebrou no campus de Ferrol baixo a organización do Centro de Investigacións Tecnolóxicas (CIT) de Esteiro. O seu director, Ana Gosset, lembrou que o campus non só destaca neste ámbito pola formación que se imparte sobre prototipado, modelado e tecnoloxías 3D na EUDI, senón tamén polos estudos relacionados coa fabricación aditiva que levan a cabo un bo puñado de investigadores das Politécnicas de Esteiro e Serantes, como os dos grupos de Aplicacións Industriais do Láser, Polímeros ou Enxeñería Mecánica.
Neste sentido, Gosset anunciou que a fabricación aditiva será un dos eixos centrais ao redor dos que virará a actividades do futuro Centro de Investigación da Industria Intelixente de Ferrol, que a Universidade da Coruña ten previsto construír no campus de Esteiro a medio prazo. A xornada tamén contou coa asistencia do reitor, Julio Abalde, quen incidiu na importancia de que os investigadores se adianten ás esixencias da industria 4.0 e mesmo ás que no futuro demandará a «industria 5.0».