O fútbol é parte importante da miña vida desde fai xa moitos anos. Se algo nos regala este deporte é o privilexio de coñecer a persoas marabillosas, persoas que dedican a súa vida ao servizo dun club, un proxecto, un pobo… Son persoas que, en moitos casos, convertéronse para min en grandes amigos, amigos como Juan Luis Villamisar.
Coñecín a Juan Luis grazas ao fútbol, cando formaba equipo para dirixir a Real Federación Galega de Fútbol. Entón foi cando Juan Luis converteuse na persoa de referencia para o fútbol na Coruña. Pasado o tempo, podo afirmar con orgullo que foi unha elección máis que acertada. Juan Luis gañouse con suor o respecto e o cariño de todos, tanto na Coruña como en Galicia, quizá porque sempre estaba disposto a escoitar, axudar e buscar solucións aos problemas do día a día. E, sempre, desde a eficiencia, a serenidade e o diálogo, sen facer ruído.
A súa experiencia como dirixente ao longo dos anos no Imperátor OAR permitiu ter un amplo coñecemento do fútbol en todos os seus aspectos. Pero Juan Luis non foi só un home de fútbol, era unha persoa marabillosa. Sempre estaba disposto a botar unha man, no que fose necesario, e a todos e para todos. Por iso é polo que se nos marche cun enorme recoñecemento na súa cidade, A Coruña, e en especial no seu barrio, a Sagrada Familia.
O seu inesperado falecemento deixounos a todos conmocionados. Juan Luis demostrara unha gran fortaleza loitando contra o Covid e, paradoxos da vida, cando máis gozaba do fútbol e das súas tarefas federativas, foi o seu enorme corazón, do que facía gala en cada acción e en cada conversación, o que nolo arrebatou sen avisar, sen facer ruído, como sempre na súa vida.
Quedaranos para sempre o seu legado e unha lección de vida: Juan Luis foi, por amais de todo, unha boa persoa. Ao noso lado estará Laura, a súa esposa e compañeira de vida, e por suposto amiga. E os seus fillos, Juan e Jorge, nos cales podemos ver todos eses valores que Juan Luis sempre nos transmitía.
A dor invádenos, pero tamén o orgullo de compartir tanto cunha persoa inesquecible e ao que xa botamos de menos. El foi parte fundamental da gran familia que formamos con todos os membros da Xunta Directiva e compañeiros da Federación Galega. Unha persoa de fútbol, ao servizo dos clubs e que levaba no seu corazón ao Imperátor, á Sagrada Familia, ao Dépor, a Coruña, á Federación e en definitiva ao fútbol. As interminables mostras de cariño e respecto recibidas estes días desde toda Galicia e desde outras comunidades non son máis que a constatación de que Juan Luis era unha persoa excepcional.
Nunca te esqueceremos, Juan Luis.
Grazas por todo, amigo, e ata sempre.