Iván Carril pecha a súa exitosa etapa no banco do Noia: «Tiven a sorte de vivir cousas moi bonitas. Agora dáse por rematado un ciclo»
FUTBOL GALLEGO
O técnico de Boqueixón conseguiu dous ascensos a Terceira nas súas seis campañas no club
01 jun 2025 . Actualizado á 19:52 h.No fútbol de elite e tamén no modesto é pouco habitual que un adestrador ocupe o mesmo banco durante seis tempadas consecutivas. É máis común ver un baile de técnicos, esa figura que cando as cousas non van como agardaba é o primeiro en pagar o pato. Iván Carril e o Noia apostaron por un proxecto que tivese continuidade e, así, o preparador de Boqueixón viviu seis anos marcados polo éxito na que xa, como aínda recentemente afirmou, considera a súa casa. Pero case todas as historias, por moi felices que sexan, teñen un final e o idilio de Carril e o Noia concluíu oficialmente este domingo.
Co Xullo Mato como escenario, ese recinto no que os afeccionados tanto gozaron do seu equipo nos últimos tempos, Iván Carril e o presidente do club, José Luis Botana, fixeron un anuncio que, a pesar de agardado, a gran maioría de afeccionados noieses non quererían oír. Técnico e entidade separasen os seus camiños e a partir de agora empeza unha nova vida para ambos.
Nas súas seis tempadas no banco do Noia, Iván Carril conseguiu crear un equipo cunha imaxe recoñecible, sempre priorizando o bo trato ao balón. Apostou por xogadores mozos e con proxección, dándolle importancia tamén aos veteranos e logrando crear bos grupos de futbolistas que tiñan claro o que debían facer.
O mellor momento
Na rolda de prensa da súa despedida, o xa extécnico do conxunto noiés asegurou que «tras seis anos tiven a sorte de vivir cousas moi bonitas no club e no pobo. Agora dáse por rematado un ciclo nun momento inmellorable despois de conseguir o ascenso e asinar unha tempada espectacular».
«Non podo darlle moito máis ao Noia», afirmou Carril, quen está seguro de que «aquí se van a seguir facendo as cousas moi ben». Agradeceu ao presidente, que estaba ao seu lado, a confianza depositada nel e lembrou que «é o único equipo sénior que adestrei». Puxo en valor o traballo que se realiza no club, «con pasos firmes e sólidos».
Considera o de Boqueixón que agora debe ocupar o banco alguén que chegue con «enerxías renovadas e outra mensaxe para intentar manter e mellorar conseguir. Para min, péchase un ciclo súpers exitoso e de aprendizaxe. Este club e este pobo xa son como a miña casa. Vou tranquilo e satisfeito».
No que respecta ao seu futuro, Iván Carril explicou que non ten nada asinado e que o seu obxectivo é, como logrou sendo xogador, acadar o fútbol profesional: «Non teño présa, hai moito tempo. Cada ano é unha aprendizaxe para sumar experiencia e formarme para mellorar e chegar o máis arriba posible». Aínda que por agora quere seguir adestrando en Galicia por motivos persoais, non descarta nun tempo dar o salto fóra da comunidade e, incluso, do país.
O que lle toca agora ao Noia é buscar ao seu substituto. Adiantou José Luis Botana que en breve darase a coñecer o nome do técnico que collerá as rendas do equipo. Iso si, antes desfíxose en eloxios cara a un Iván Carril ao que lle desexou sorte e agradeceu os servizos prestados: «Quero enxalzar a aprendizaxe que tivemos ao seu lado. É unha persoa que che fala con amor por este deporte e transmíteche ilusión e ganas».
Sobre a substitución, sinalou que buscan «algo parecido a Iván, cun proxecto para traballar a medio e longo prazo, sen présa. Temos tranquilidade e paciencia para non deixarnos levar por catro resultados puntuais. Tamén temos que tentear aos xogadores para manter un bo grupo que nos permita loitar pola permanencia».