O equipo peor clasificado de Galicia, o Suuuuuuu, unha homenaxe a Cristiano

Mónica Irago

Futre Da Rocha é un personaxe imprescindible na historia recente do fútbol do Grove. Militou nos catro conxuntos da localidade arousá, algo do que presume porque di que é o único que o fixo, foi un dos promotores da resurrección do Anduriña hai cinco anos e fai tres comezou a traballar para crear un novo equipo. Meu dito meu feito. O SUUUUUUU FC comezou a súa andaina no panorama futbolístico galego o pasado ano (cunha única vitoria na súa marcadora ao final de Liga), e leste, encadrado no grupo 2 da Terceira Futgal, é o pechacancelas e o conxunto de Galicia peor clasificado. O cero aparece na súa marcadora de puntos e a diferenza de goles é de menos 70: marcou seis e encaixou 76.

Futre, que ademais de presidente é xogador aos seus 41 anos, explica as razóns deste mal inicio nas dificultades de crear un equipo de cero e en que practicamente non puideron facer pretemporada. De feito, non xogaron ningún partido de preparación. «É moi complicado poder competir con outros equipos que levan moitos anos formados. Fai falla tempo, rodaxe....», explica.

Trátase de manter a moral alta, aínda que a situación é difícil. «A ninguén lle gusta ir xogar un partido sabendo que vas perder, sabendo que te van meter sete ou oito», recoñece o presidente, que se esfuerza en inculcar aos seus compañeiros a necesidade de aguantar o ballón. «Todos os campións empezaron perdendo», afirma.

De superar dificultades sabe moito Futre, porque montar un equipo desde cero é moi complicado, e máis nun lugar como O Grove, onde a competencia é dura ata para conseguir futbolistas. «Fomos fichando os xogadores a través dos amigos dos amigos. Habendo catro equipos no pobo é moi complicado fichar. Non da para todos e nós case todos os que temos son xente de fora», explica o presidente.

A razón do nome

Pero, por que ese nome? «Entre broma e broma cos amigos déuseme por facer o equipo e chegamos co tema este do Suuuuuuu», explica o presidente. O asunto gaña interese cando se comproba que Futre, como o seu alcume indica, é seguidor do Atlético de Madrid, co que non é entende moi ben que se decidiu por esa denominación. El explícao: «Son fillo de pai portugués e de nai española. O meu pai era un fanático do Atlético de Madrid da época de Futre e a min puxéronme Futre por meu pai. O nome púxenllo por Cristiano, claro, aínda que son do Atlético de Madrid, pero porque é portugués, porque é un referente da selección portuguesa non porque estivera no Real Madrid», explica, e engade que a outra razón principal é que o seu avó si que era un gran seareiro do Real Madrid.

O obxectivo da tempada, ademais de consolidar o equipo, que necesita un mínimo de nove mil euros de presuposto para poder afrontar os gastos, que aínda que son mínimos, existen en calquera categoría, é lograr a primeira vitoria. A oportunidade máis inminente chegará este sábado a partir das cinco da tarde en Cambados contra o Beiramar, pero non parece que sexa a máis doado porque o rival dos grovenses está instalado na terceira praza da clasificación. A máis accesible, quizais, será a seguinte fin de semana, cando o seu adversario será o Bamio, que é o conxunto que lle precede na clasificación e que ten unicamente tres puntos.

Un escudo cunha silueta recoñecible, pero grovense

Á marxe do nome, que xa é unha pista boa, a homenaxe que no SUUUUUUU FC réndeselle a Cristiano non queda só aí, senón que se expande tamén cara ao escudo que se deseñou no Grove. Un escudo que ten un innegable parecido co do club no que actualmente militar o dianteiro portugués (Ao Nassr), pero cun toque grovense imprescindible.

O parecido céntrase nas cores que mandan nel, lila e amarelo, e no deseño, cunha figura central, que no caso da versión grovense son dúas. Por unha banda, a imaxe dunha icona da localidade como é a estatua da familia mariscadora. Polo outro, unha silueta moi recoñecible, polo xesto, pero que non é o que parece.

Únete á nosa canle de WhatsApp

A súa postura favorita

Certo é que a postura é máis que famosa e é a que fixo Cristiano Ronaldo en preto de un milleiro de ocasións ao longo da súa carreira. A sucesión de feitos adoita ser a seguinte: gol do portugués, carreira cara á liña de fondo, se é posible cara ao banderín do saque de esquina, salto con reviravolta para caer mirando cara ao centro do campo, o berro do Suuuuuuu e os brazos marcando musculatura. Esa última postura é a que aparece na zona central do escudo, pero, ollo, que non é o futbolista luso senón que é o propio Futre Da Rocha o que nela aparece. Unha solución moi acertada, sen dúbida, para evitar problemas cos dereitos de imaxe. E unha sentida homenaxe ao seu pai e ao seu avó que, a pesar de ser de clubs moi rivais, tiñan un ídolo en común.

---

---

---