O Barbadás iguala nas Somozas e suma por terceiro partido consecutivo (0-0)

A Unión Deportiva Barbadás iniciou a súa semana máis esixente co primeiro dos tres partidos que debe afrontar. E fíxoo cun longo desprazamento matutino ao campo do Somozas, onde engadiu un punto máis á súa conta, tras unha pugna nivelada e con poucas ocasións de gol: 0-0.

Os homes de Agustín Ruiz concederon máis terreo na fase inicial dun encontro que os de casa quixeron pór ao seu favor canto antes, pero a defensa azulona —onte de negro— foi solvente e, en última instancia, tamén o meta Borja mostrouse acertado cando Cambón ou Julián Neto chegaron ben á área dos ourensáns, que remataron por impor os seus axustes na parcela ancha e deixaron de pasar por algún abafo, nos minutos previos ao descanso.

Ao contrario, o Barbadás seguiu crecendo na segunda entrega do encontro e tamén se foi aproximando máis á meta de Paco a medida que avanzaba o cronómetro. De feito, os cambios de ambos os técnicos sentaron mellor á escuadra visitante, nun partido no que en todo caso, non se xogou demasiado nas áreas.

Ismael, Litos e Xinzo refrescaron a vangarda forasteira, nun intento de esgotar as súas opcións de triplicar o botín, pero non se moveu o marcador nin nun nin noutro sentido.

O resumo de Agustín Ruiz apuntaba cara á entrega do seu persoal: «Custounos, metéronnos atrás, porque non entramos como tiñamos que entrar. Despois non sufrimos, porque estivemos serios. Xerouse, non metemos. Xa sabemos que temos iso desde o principio e debemos fomentar as outras virtudes, pero estou moi orgulloso do esforzo dos mozos».

Tras a vitoria ante o Pontevedra B, os dos Carrís igualaron coa UD Ourense e o Somozas. Agora, dobre reto en casa.

---

---

---