Ordes e Boimorto recuperan as súas opcións de disputar a promoción de ascenso na Primeira Galicia
FUTBOL GALEGO
Vitorias para Flavia, Praíña, Calo e Tordoia; e derrotas para Bertamiráns e Negreira
18 mares 2024 . Actualizado ás 18:03 h.O Ordes, con tres triunfos seguidos, recuperou as boas sensacións e xa volve pelexar pola promoción de ascenso, loita na que tamén está o Boimorto, no grupo primeiro. No segundo, e despois de catro derrotas consecutivas, o Flavia volveu gañar, o mesmo que Praíña, Calo e Tordoia. A cruz foi para o Bertamiráns e o Negreira. O equipo de Adrián Vázquez agora só mantén catro puntos de diferenza sobre o Puebla e o Cordeiro, segundo e terceiro clasificado, respectivamente.
Mentres, cinco equipos están igualados a puntos na zona alta do grupo primeiro da Primeira Galicia. Cinco conxuntos, con 44 puntos, están a pelexar polo terceiro posto, segunda praza que dá acceso a disputar o play off de ascenso. Trátase de Carral, Olímpico, Boimorto, Cultural Maniños e Ordes.
O Boimorto deixou escapar no último minuto a oportunidade de ocupar o terceiro posto en solitario. Aos 19 minutos adiantouse por medio de Iván López, que anotou o seu gol número 15 do torneo. No 90, Roibas arrebatoulle dous puntos ao conxunto rojillo.
A gran sorpresa da xornada protagonizouna o Ordes no campo municipal de Vista Alegre. Derrotou ao líder O Val (2-0), que sufriu a súa segunda derrota do curso. O primeiro tanto, aos 27 minutos, foi obra de Álex Sánchez. No 60, sentenciou Samuel Ríos anotando o seu sexto gol do campionato.
Grupo segundo
No grupo segundo, vitorias para Calo, Tordoia, Praíña e Flavia, e derrotas para Negreira e Bertamiráns.
O Negreira perdeu por 2-0 ante un dos seus dous rivais na loita polo ascenso directo. O colectivo rojillo non puido co Puebla . Artur marcou no minuto oito e Edu sentenciou no 88. Os negreireses mantéñense en solitario á fronte do pelotón, con 61 puntos. Séguenlle Puebla e Cordeiro, con 57.
O Flavia goleou a domicilio ao Valiño en Cabo de Cruz (1-4). Álex Pérez marcou os dous primeiros para os padróns aos seis e aos dezaseis minutos. Suma cinco goles neste curso. O 1-3 foi obra de Damián Otero, no 45, e o 1-4 anotouno David Calvo, no 71. Damián Otero leva xa 16 tantos.
O Praíña superou no Juan Amado ao Agolada (4-2). Os dous primeiros foron de Marcos Caneda. O terceiro e o cuarto levaron a firma de Adrián Ferreiro, que contabiliza 10 goles.
Tamén gañaron Calo e Tordoia. Os dous sumaron os tres puntos a domicilio. O Calo superou por 1-2 ao Dumbría. Adiantáronse os locais, pero na segunda parte Andrés Boada, no 54, e Marcos Mella, no 90, déronlle a volta ao marcador.
En Fisterra tamén se puxo con vantaxe o equipo de casa. Denis Pose, que xa leva 11 goles, e Alberto Fraga, que suma 18, igualando no pichichi a Gonzalo Suárez, do Negreira, déronlle a volta ao partido nos minutos 25 e 59. Empatou o Fisterra no 73, pero Denis Pose rabuñou os tres puntos no 85.
Peor sorte tivo o Bertamiráns, que caeu en casa fronte ao Cordeiro (1-2). Cea adiantou aos de Ames, no 46, pero os visitantes déronlle a volta ao choque en cinco minutos con goles anotados no 56 e no 61.
O Tordoia está a sete puntos da promoción, na quinta praza. O Flavia é sexto, con só 44 puntos. Calo e Praíña, con 32, superan en sete ao Estrada, que marca a terceira praza de descenso.