O Breogán avanza na súa preparación con outra vitoria sobre o COB (81-99)

O segundo derbi da pretemporada rematou con outra derrota do Club Ourense Baloncesto ante un Breogán que deu fe do seu caché ACB para imporse na consolación dAs Burgas Cup, un certame co cal os anfitrións quixeron dinamizar o espectáculo que pretenden ofrecerse aos seus afeccionados ao longo do curso, contando con invitados de luxo para esta primeira edición. Os homes de Moncho luciron unha proposta máis cociñada que a da Copa Galicia e, de feito, recortaron distancias no marcador, para ceder ao cabo no último cuarto: 81-99.

Os anfitrións melloraron en todos os sentidos, con respecto ao pretérito 108-75 do torneo autonómico. E é que atoparon desde o inicio ao que debe ser unha das súas pezas básicas ao longo do curso, o francotirador Gabe Kalschuer, quen non tardou en enchufar o seu primeiro triplo, xusto cando os lucenses se rebelaran ao 5-0 inicial de Gill e McDonnell. O equilibrio mantíñase nun primeiro acto de pouco ritmo e de intercambio de golpes, ata que o Breo aproveitou os primeiros descoidos ourensáns na circulación de balón e golpearon á contra con canastras doados que abriron a primeira fenda, grazas a un parcial de 2-10, que maquillaron os de casa cun triplo do mozo Huguet, antes de pechar eses dez minutos cun 21-30, ao mando dos discípulos de Luis Casimiro.

Entre que os cobistas apertaron mellor en defensa na segunda entrega, dominaron o rebote con autoridade (19-9) e os visitantes reincidían en minutos de desconexión que os sacaron do partido, o parcial de 21-18 a favor do COB incrementaba as súas opcións de tutear ao inimigo de superior categoría, que aínda así marchou ao intermedio cunha renda de seis puntos (42-48). Era unha fase do enfrontamento na que Kalschuer brindaba a súa achega máis magra, secundada tamén por dentro con Kingsley Okanu, o último en chegar, que lle daba unha notable enerxía á achega dos de casa.

O terceiro cuarto foi outro cantar. Desde o banco breoganista non deixaban caer a intensidade do seu quinteto, no que Dreznjak asumiu maior protagonismo en ataque, a pesar de que un tapón de Romaro Gill enardecía aos cobistas, antes de que Bakary Dibba tamén axitase emocións cun contragolpe selado con mate, para asinar un parcial de 3-10 e abrir os algarismos a 51-62. Aínda que Sexan McDonnell tamén quixo reivindicar o dano que pode facer abríndose máis aló da liña de tres, o choque entrou na súa última escena cun 60-74 que parecía complicar bastante a eventual remontada ourensá.

E iso que a Kalschuer uníronse os mozos Sergi Huguet e Isaac Vázquez, demostrando que están dispostos a crecer en cada minuto que lles conceda López Suárez. Incluso o público llo creu con 77-83, tras o segundo mísil exterior do fillo de Sony Vázquez.

No bando dos de Casimiro aparecía como sempre Keandry Cook, nos momentos delicados, asumindo un liderado que non podían replicar desde as filas do seu opoñente, con Rafa Lisboa aínda sentado no seu banco, tras brillar con luz propia na selección portuguesa que acudiu ao Eurobasket. Esta vez tocoulle tirar do carro desde fóra, animando aos seus compañeiros.

Na recta final e co choque máis deslavazado, a calidade lucense marcaba diferenzas e Moncho López seguía o guion de repartir minutos e cargas entre todo o seu persoal, coa mente xa na Primeira FEB. Un espello do que se vía no outro banco, onde os breoganistas se achegan a outra ilusionante campaña ACB. Un vello coñecido como Salva Arco saltou á pista para a repartición de trofeos. Xa queda menos.

COB OURENSE:  Vázquez (8), Kalscheur (20), Smith (2), McDonnell (15), Gill (10) —quinteto inicial—, Okanu (12), Fernández (0), Huguet (8), Seixas (2), Iglesias (2) e Jurgens (2).

 RÍO BREOGÁN: Russell (5), Cook (17), Dibba (9), Dreznjak (14), Sakho (8) —quinteto inicial— Apic (10), Alonso (3), Aranitovic (14), Brankovic (8), Quintela (4), Visconti (6) e Cvetkovic (1).

 PARCIAIS POR CUARTOS: 21-30, 21-18, 18-26 e 21-15.

ÁRBITROS: Jacobo Rial, Juan Francisco Fernández Cuevo e Pablo Rodríguez Fernández.

INCIDENCIAS: Pazo Paco Paz. Entretido ambiente para As Burgas Basket Cup, con animación previa no exterior.

---

---

---