Os de Mrsic debutan no Pazo ante un Fuenlabrada que ven como rival directo pola salvación e chega sen Ehigiator
02 oct 2022 . Actualizado ás 19:08 h.A afección do Río Breogán volve respirar o agradable aroma da ACB 4 meses e 16 días despois. Foron 141 días de longa espera, para moitos eterna, que este domingo por fin remata co gallo de unha segunda xornada que trae ao Pazo ao Carplus Fuenlabrada e propicia a primeira gran final da tempada para o conxunto local (12.30 horas. Movistar Deportes). O rival non é de altura e precisamente iso é o que acentúa a relevancia do duelo para os pupilos de Veljko Mrsic, que a recado cambiarían a vitoria do partido inaugural na cancha do UCAM Murcia pola desta cita diante da súa xente. Non tivo reparos o preparador breoganista en conceder un valor extra á cita sinalando ao equipo fuenlabreño como rival directo na maratoniana carreira pola permanencia, recoñecendo así que repetir as fazañas do curso pasado será algo extremadamente complicado para a súa tropa.
De novo baixo a batuta de Josep María Raventós, o Fuenlabrada está en practicamente todas as quinielas como candidato a sufrir ata o último instante para sobrevivir na Liga Endesa. Xa pasou por tan angustioso transo a pasada tempada, cando sentenciou a súa permanencia na xornada final cunha esmagadora vitoria en Burgos que ademais significou o descenso dos locais. E nesta campaña o seu arranque non foi nada alentador, posto que no partido inaugural deixou escapar un triunfo de quilates en casa ante o recentemente chegado Covirán Granada, outro dos sinalados como candidato a establecer o seu domicilio no soto da clasificación.
Coas primeiras urxencias e sen o lesionado Osas Ehigiator preséntase o Fuenlabrada no santuario breoganista, ademais de con seis caras novas. Ao persoal hanse sumado este verán catro xogadores xa con experiencia no baloncesto español como Clevin Hannah (MoraBanc Andorra), Pavel Savkov (Cazoo Baskonia), Viny Okouo (Monbus Obradoiro) e Javi Beirán (Movistar Estudantes), e dous procedentes da máxima categoría de Francia: Jeremy Senglin (Nanterre 92) e Lasan Kromah (Fos Provence).
No Breo, exultante pola súa fazaña en Murcia, está no aire o concurso de Erik Quintela por un problema muscular na zona inguinal que xa lle impediu participar no encontro anterior.