Desde onte e ata o domingo un milleiro de vehículos exponse no recinto de feiras e exposicións da capital ourensá, para intentar espertar o interese dos compradores. Alfa Romeo, Audi, BMW, Dacia, Fiat, Ford, Honda , Hyundai, Kia, Land Rover, Mazda, Mercedes -Benz, Nissan, Opel, Peugeot, Porsche, Renault, Seat, Skoda, Suzuki, Toyota, Volkswagen e Volvo aproveitarán a súa presenza no certame para presentar os últimos lanzamentos e os vehículos que van comercializar de cara á campaña do 2015. O obxectivo é presentar unha oferta completa e atractiva, coa que se cubran todas as gamas e modelos de vehículos, de forma que sexa máis sinxelo adaptarse ás preferencias dos visitantes. Así, poderase adquirir un coche novo desde 6.000 euros. Cada concesionario ten un espazo reservado para as súas primicias e, na feira, pódense ademais atopar modelos recentemente chegados de fábrica, que se presentan por primeira vez en Europa e dos que aínda non hai ningún matriculado, xa que ata hoxe non podían atoparse nos concesionarios do país. Seis mil euros de desconto Ademais, para animar aos participantes á compra, sortearanse seis mil euros entre quen adquiran un vehículo. Ese diñeiro descontarase do prezo final.