Polémica visita da conselleira de Medio Ambiente en funcións ás Fragas do Eume
PONTEDEUME
Os alcaldes das Pontes, Pontedeume, Monfero e A Capela, todos do PSOE, que non foron invitados, a diferenza do de Cabanas, do PP, piden a súa dimisión «polo desprezo aos veciños»
29 feb 2024 . Actualizado ás 05:00 h.A conselleira de Medio Ambiente e vicepresidenta da Xunta en funcións, Ángeles Vázquez, acudiu onte a Pontedeume para asinar a compra de tres parcelas de 2,9 hectáreas en Monfero , dentro das Fragas do Eume. Esta operación súmase á subscrita dous días antes das eleccións autonómicas, coa adquisición doutras tres leiras, dúas hectáreas, no parque natural, en Cabanas e As Pontes.
Vázquez lembrou que a Xunta dispón dun orzamento de 1,1 millóns de euros para comprar terreos privados nas Fragas e sinalou que o Goberno galego «ten localizadas unhas 400, que suman 200 hectáreas». Reiterou que o parque conta cun Plan Reitor de Usos e Xestión (PRUX) —contra o que levan case un ano mobilizándose as asociacións de propietarios— e que o obxectivo de adquirir propiedades privadas «é realizar actuacións de conservación e restauración de zonas de máximo interese desde o punto de vista ecolóxico, eliminando e retirando especies invasoras e mellorando a continuidade das masas de frondosas autóctonas».
Tamén se achegou á estrada de acceso ao mosteiro de Caaveiro, para ver «os traballos de urxencia que a Xunta está executando: limpeza de cunetas, desaugadoiros e retirada de pólas de árbores e rochas». Avanzou que seguirán con ». «novos desaugadoiros e o arranxo das fochas do firmeE explicou esta actuación, «ante as dificultades para determinar quen é o titular da estrada e tras constatar que os contactos con Deputación, Goberno central e concellos para esclarecer o asunto non permitían avanzar na busca dunha solución ao seu deterioro».
Acompañárona o portavoz do PP na corporación de Pontedeume e o tamén popular alcalde de Cabanas, o que causou «un profundo malestar» aos seus homólogos socialistas de Monfero, Pontedeume, A Capela e As Pontes, aos que nin sequera se informou da visita. Nun comunicado conxunto, falan de «un comportamento pouco democrático e unha nova mostra de falta de respecto institucional dunha conselleira que despreza aos veciños de catro concellos». E piden a dimisión de Vázquez, «polas reiteradas mostras de desprezo e a súa actitude na xestión das Fragas».
Os rexedores pregúntanse, ademais, «que cambiou para que despois das queixas de James Rhodes [pianista] nas redes sociais polo lamentable estado da estrada, a Xunta asumira as súas competencias e realizara as obras, despois de moitos meses argumentando que a estrada non figuraba no inventario de estradas de titularidade autonómica». Aluden á cita electoral e tachan de «vergoña e comportamento indigno vir facerse agora unhas fotos e non avisar aos representantes dos veciños, por non falar do estado no que seguen as pontes do parque ou do proceso de tramitación do PRUX».