O animal desapareceu, en apenas media hora, xusto antes de que a empresa de lacería fóra a retiralo
18 abr 2021 . Actualizado ás 12:09 h.Unha corza morreu atrapada na rede que rodea o campo de fútbol da Gándara, en Pontedeume. Alguén avisou do achado ao servizo de urxencias 112, o sábado pola mañá. Axentes do Servizo de Protección da Natureza (Seprona) e voluntarios de Protección Civil acudiron ao lugar e comprobaron que o animal levaba varias horas morto.
Media hora despois, cando persoal da empresa de lacería que colabora co Concello eumés chegou para retirar o corpo, xa non estaba. Ninguén sabe quen, pero parece claro que alguén levou o animal. «Isto é un misterio, era unha corza de pouca idade, movémola un pouco cara a un lado, e ao intre desapareceu. Seguramente levaba enganchada na malla desde a noite do venres, e acabou afogándose intentando liberarse», explica o xefe de Protección Civil, Francisco Saavedra.