En total colocáronse vinte e catro elementos informativos
15 novs 2018 . Actualizado ás 05:00 h.Pontedeume estrea nova sinalización coa que busca dar a coñecer os seus recursos turísticos. En total colocáronse vinte e catro elementos informativos. Catro deles trátase de mesas interpretativas con información dos monumentos que se sitúan na Alameda de Raxoi -explica a historia do convento de San Agostiño-, na ermida de Breamo, na contorna do Castelo de Andrade e nos xardíns de Lombardero -dá información acerca da historia do xardín e das especies que se atopan nese espazo como a Árbore dá Bruxa ou un metrosidero recolleito no Catálogo Galego de Árbores Senlleiras-. Tamén se colocou un cartel de grandes dimensións na estrada N-651 co recoñecemento de «Pontedeume conxunto histórico» e unha placa na Biblioteca Municipal Ramiro Fonte en referencia a se antigo papel de Cátedra de Latinidade. Para rematar, a vila conta con sinalización e 18 balizas en total en dous carreiros, o que chega ao Castelo de Andrade desde o paseo marítimo e o que conecta as coñecidas como Escaleiras do Monumento. A Concellería de Turismo realizou a actuación ao amparo dunha liña de subvencións da Axencia de Turismo de Galicia do 2018.
Nas próximas semanas o Concello organizará diversas actividades de sendeirismo para dar a coñecer as rutas, os lugares de interese e as vistas panorámicas.