O PP acusa ao anterior goberno ortegano de deixar unha débeda de case dous millóns
ORTIGUEIRA
O novo alcalde pediu un informe de auditoría que reflicte un saldo nas arcas municipais de menos de 3.000 euros
08 ago 2023 . Actualizado ás 05:00 h.«O Concello de Ortigueira conta con menos de 3.000 euros de saldo nas súas contas para facer fronte aos gastos en todo o que resta de 2023». É a denuncia do novo goberno popular a cargo de a alcaldía ortegana. O novo rexedor, Valentín Calvín, solicitou un informe de auditoría ao servizo de Intervención nos seus primeiros días no cargo. Remitido o pasado 30 de xullo, explican desde o Concello, o estudo reflicte unha complicada situación económica cun saldo nas arcas municipais a 17 de xuño de 2.811,93 euros. «Os créditos orzamentarios atópanse totalmente esgotados», advirte o rexedor. Explica que para non incorrer nun gasto adquirido indebidamente para calquera pagamento, o goberno municipal buscará a adopción de acordos co resto de grupos para efectuar modificacións orzamentarias.
Tamén advirte da débeda municipal. En xuño era de 1,6 millóns de euros, aos que hai que sumar 311.782,53 euros que procede da relación de facturas confirmadas pero sen crédito.