A historia interminable da piscina de Narón: dous veráns sen mergullos no Couto
NARÓN
O Concello indica que agora falta a recepción de óbrala pero xa pode verse o resultado, a oposición critica os continuos atrasos
11 sep 2025 . Actualizado á 05:00 h.Como ao maná agardaban os veciños de Narón pola apertura da súa ansiada piscina estival. Pero por segundo verán consecutivo, o mergullo tivo que agardar. A apertura desta infraestrutura municipal xa acumula así dous anos de atraso respecto á primeira data prevista. Segundo fontes do Concello, agora a piscina está pendente da recepción da obra. E técnicos municipais e da propia empresa terán que decidir se todo se atopa correcto. Só a primeira ollada, a execución parece finalizada: un espazo con piscina principal, outra infantil e zona de praia exterior cun total de 469,14 metros cadrados. Pero os técnicos decidirán se cumpre os requisitos.
Á falta da súa recepción, o proceso espertou durante este tempo a preocupación do goberno local e da oposición. Terra Galega goberna en minoría con 10 concelleiros nunha corporación de 21. Desde o PP, grupo maioritario na oposición con seis edís, o seu portavoz Germán Castrillón indica que «a piscina do Couto é o exemplo perfecto da incapacidade do goberno de Narón: como en tantas outras obras, tarde, mal e arrastro». Lembra que «esta instalación debería estar funcionando no verán de 2024 e xa pasou o verán de 2025 sen que os veciños poidan usala, é hora de deixar de xogar coas expectativas da veciñanza e de cumprir co prometido».
O portavoz municipal do BNG (tres concelleiros), Olaia Ledo, considera que «Terra Galega goberna a golpe de tráiler pero nunca se chega a ver a película». Os nacionalistas aseguran que «Narón merece máis que esperar e desde o BNG estamos preparadas para ser a solución, o da piscina é un de moitos incumprimentos».
E para o PSOE naronés (dous edís), con Jorge Ulla, trátase «dunha xestión errática que privou á cidadanía do segundo verán consecutivo de desfrutar da instalación». Cando o Concello confirmou en xuño que existía unha sexta prórroga, Ulla esixiu a rescisión do contrato e multas económicas «polo grave atraso». Os socialistas insisten en que «o emprazamento natural desta infraestrutura era Xuvia». Hablan de «erro de planificación inicial que xerou frustración, deixadez inaceptable na execución, ineficacia da empresa adxudicataria, e falta de control e esixencia por parte do goberno local». Tamén denuncian «a falta de transparencia por non atender os nosos requerimentos de entregar o expediente completo».
Con cafetería
Todo este espazo de lecer (que usarán bañistas e clubs deportivos) inclúe unha cafetería de 27,7 metros cadrados, dúas zonas diferenciadas de vestiarios ou un cuarto para a realización dos primeiros auxilios. Os traballos correron a cargo de Coto Estudo e Construcións S.L. por 657.937 euros. Os atrasos atribuíronse desde ao mal tempo á falta de material, entre outros motivos.