As Cookies de Narón, irmás pequenas de Lil Kids, adoradas por Lola Índigo e Mario Casas: «Chamáronnos de Got Talent»
NARÓN
A academia Paso a Paso segue arrasando cos seus grupos de baile
25 abr 2024 . Actualizado á 18:55 h.Todos choraron ante o televisor cando as bailarinas Lil Kids gañaron en Got Talent. Pero agora estas mozas da academia Paso a Paso de Narón teñen unhas irmás pequenas igual de arrasadoras. Chámanse Cookies e empezan a triunfar por toda España. Ata tal punto que unha das súas actuacións en Benavente, no campionato Hometown Urban Dance, levantou a paixón nas redes de famosos como Mario Casas ou Lola Índigo. Cando colgaron a actuación en Instagram, a cantante e tamén gran bailarina canaria comentou: «Por favor, encántanme», con emoticones de corazóns. E o actor coruñés colgou un reel do campionato cunha actuación de bailarinas de paso a Paso, felicitando á organización: «Volvéstelo a facer».
A cargo desta academia atópanse as novísimas irmás Pau Maceiras e Patri Maceiras, de 26 e 33 anos, que a montaron en 2010. «Empezamos dando clases nas asociacións ata xuntar a tanta xente que tivemos que buscarnos a vida, agora temos máis de 300 alumnas e alumnos», indica Patri, que tamén conta con Tati Díaz, de 28, como profesora de baile. A día de hoxe, profes e alumnas seguen «saboreando o éxito de Got Talent, cada semana recibimos algunha chamada para pedirnos unha actuación do grupo de Lil Kids».
E a raíz dese éxito, todos os grupos da academia espertan grande atención mediática. De feito, desde o mesmo programa de televisión en Telecinco fixeron seguimento das Cookies: «E chamáronnos outra vez de Got Talent para estudar unha posible participación». Estas nenas teñen de sete a nove anos e participaron nese Hometown Urban Dance, que organizan Christian Casas (irmán de Mario) e Mónica Peña (bailarina tamén de Black Eyed Peas ou Shakira).
[[@instagram::
Ver esta publicación en Instagram
]]
«Estamos moi contentas por elas e polas Lil Kids, ademais de por todos os nosos grupos; en Lil Kids tamén entendemos que despois de tanto éxito son nenas e non poden saturarse, tamén teñen que baixar coas súas amigas e ir a Odeón», indica Patri Maceiras. Están a chamalas para participar en actos de Madrid ou para actuar no Celta. Mentres tanto, segue o fervor dos famosos: «Andrés Suárez sempre comenta as nosas fotos, pero cando vimos que nos felicitaba Lola Índigo non nolo criamos».
Por detrás hai moitísimo traballo: «Lil Kids teñen abril completo, actuacións en maio cada semana, pero nos organizamos coas familias porque teñen de 11 a 18 anos e deben ir ao cole». As irmás Maceiras admiten que «vivimos un soño feito realidade, con Lil Kids todo empezou por un vídeo que se volveu viral, vímonos en Got Talent, preparamos unha coreo en tempo marca con todo o amor do mundo e gañamos». Agora agardan gozar do premio cunha posible viaxe a Eurodisney.
Mentres tanto, as Cookies xa fixeron catro campionatos esta tempada «sempre quedando de primeiras ou segundo, levan só seis meses bailando xuntas pero traballan moi ben». Arrasan por onde pasan cos seus pantalóns prateados, pano á cabeza e trencitas no pelo. Por diante queda un verán moi intenso, «pero gozando aínda deste soño, tanto as nenas como nós».