Fene, amor polos rizos cos caniches máis riquiños: «É o segundo can máis intelixente e non cheira aínda que tardes dez días en lavalo»
FENE
Máis de cen mascotas cos seus donos participaron na Canichada con disfraces de rockeiro, brujita ou noiva gótica
27 abr 2024 . Actualizado á 18:12 h.Co violeta chapeu picudo de brujita, chupas de rockeiro ou vestidos de noiva gótica, máis de cen caniches cos seus donos citáronse hoxe en Fene. A segundo Canichada de Galicia, celebrada ata as 18.00 horas no pavillón da Xunqueira (Santo Valentín), duplicou asistentes con respecto á edición anterior. Contou cun desfile de Entroido e reuniu a todos os amantes de tan riquiño animal. Segundo Lidia García Teijeiro, organizadora do evento a través de Caniches de Galicia, todo o mundo quéreo porque «é o segundo can máis intelixente, hipoalergénico (produce reaccións alérxicas escasas ou nulas) e non cheira aínda que tardes dez ou quince días en lavalo».
A cita contou co apoio de Caniche Club España e Concello de Fene, e tamén se uniron donos de caniche a última hora que pasaban pola zona. Os participantes eran de toda Galicia, Navarra, Madrid, País Vasco ou Asturias. E no desfile, Lidia explica que «o meu ía de smoking onda a da miña sogra vestida de noiva de negro». A primeira Canichada de Galicia fíxose en outubro en Mos, con 43 cans.
En Fene houbo nove casetas e sesión de fotografía, con recadación do 3% para unha asociación de defensa dos animais. Os asistentes tamén destacan que «non soltan pelo e son súpers cariñosos». A propia Lidia García Teijeiro (que levou á criadora do seu can á cita de hoxe) empezou con Caniches de Galicia grazas ao seu can Coco, que ten un ano e tres meses. «Vin en redes que se celebraban Canichadas por Madrid, Barcelona ou Sevilla; e que en Galicia nada», indica. Ademais, «entre os caniches hai un colegueo tremendo».