San Antonio resiste a choiva, en Cedeira: «Esta é a romaría dos 'nacionais', dos de aquí»
CEDEIRA
A procesión suspendeuse e celebrarase o sábado, antes da churrascada
13 jun 2025 . Actualizado á 17:44 h.«Esta é a romaría dos nacionais, dos de aquí, é unha festa esperada por todos», repetía onte Fran, pendente da grella, man a man «cos dous Tonos», que nin o día do seu santo descansan. A ocasión meréceo. Na ladeira do monte de San Antonio do Corveiro vense poucas cuadrillas. A máis rechamante é a da agrupación Buxainas, con 40 persoas á mesa, entre elas as nenas, felices cos traxes tradicionais para bailar na procesión, que se suspendeu pola choiva. «Que pena», comentaba Meri, do mesón A Marieta, que renuncia a subir «porque hai que dar servizo á xente».
«Non sei se chegará a carne», berraba Tono, o do chapeu de palla coa banda de San Antonio, fronte unha fileira interminable de costela e chourizos criollos. «Despois veñen as empanadas e algo de bola de azucre». Aquí ninguén pasa fame, nin se molla, grazas á carpa que montaron a poucos metros da grella, protexida da auga cunha antuca.
Na parte alta, un par de cuadrillas de adolescentes, pouco preocupados pola choiva. E máis arriba, a churrera, e despois o toldo de Suso, a rebentar de xente, que se goreceu do chuvasco mentres agardaba a procesión que non foi. «Farémola mañá [polo sábado], sobre as sete da tarde», adiantou Héctor, un dos integrantes da comisión. Nin o bispo nin o párroco, que oficiaron a misa, quixeron mollarse. A poxa de roscas (elaborados pola panadería Prados, en San Román) mantívose e o máis caro acadou os 3,5 euros, e o ceo foise despexando.
Onte á noite agardaba «moita festa», coa orquestra Finisterre. «Pero o día grande vai ser o sábado, co churrasco», apuntaba Juan, con chubasquero. Na velada tocarán Os Eternos. «É un dos lugares máis máxicos de Cedeira, alí a terra e o mar fúndense nunha aperta, dando forma á ría máis fermosa do mundo», escribiu Chewis, unha das almas da banda, onda Cudi. San Antonio dá nome ao seu último disco. Despois actuará Punto clave e a noite acabará cun disyóquey. «Está claro que é o mellor sitio de Cedeira. A xente vaise a Mallorca, a Lanzarote, ao Caribe... buscando a posta de sol, e como a de aquí, en ningún lado», insistía Héctor.