O Plan Xeral deixa no aire unha promoción de vivendas en primeira liña de praia en Ares

O 5 de febreiro de 2020, a conselleira de Medio Ambiente, Ángeles Vázquez, asinaba a orde de aprobación definitiva do Plan Xeral de Ordenación Municipal (PXOM) de Ares , tras máis dunha década de trámites. Tres anos antes, en 2017, a promotora Gamundi e Fernández S. L. presentara un proxecto no Concello para levantar un edificio nun soar situado ao lado do consistorio local. Solicitaba licenza para construír un soto, un baixo, dúas vivendas (en dúas plantas) cara á rúa Santa Bárbara e unha (noutra planta), cara ao paseo marítimo, como detalla Joaquín López Gamundi, un dos administradores.

Segundo o seu relato, o Concello denegou a licenza. «Recorremos e o Tribunal Superior de Xustiza de Galicia, que era coñecedor do Plan Xeral, deunos a razón, e o Concello tivo que concedernos a licenza, en 2022», explica. Xa transcorreran case dous anos da aprobación definitiva do PXOM, que cualificaba o soar onde se proxectaba o inmoble como zona verde. López Gamundi asegura que, cando se aprobou inicialmente o novo plan urbanístico esa parcela era edificable, «pero no definitivo quedou como zona verde para poder expropialo».

A sociedade impugnou o Plan Xeral, pola cualificación da leira como zona verde, pero os tribunais déronlle a razón ao Concello, que fai un par de semanas, no primeiro pleno deste exercicio, aprobou inicialmente o proxecto de expropiación do terreo, «en execución do plan», subliña o alcalde, Julio Iglesias. O prezo establecido, «a partir da peritaxe encargada», abunda o rexedor, é de 69.900 euros, cantidade que «non» se axusta ao valor do soar, de máis de 400 metros cadrados, en opinión do promotor.

«É zona verde, pero a licenza está en vigor», reitera López Gamundi. Engade que, «ao estar nunha contorna urbanizable ten a mesma edificabilidade que a área homoxénea en que se atopa (segundo a lexislación)», e entende que ese debe ser o criterio a ter en conta para determinar a indemnización. Ademais de considerar insuficiente a contía, lembra que o Concello ten que compensarlle «pola revogación da licenza [en concepto de lucro cesante, a ganancia que deixa de obter ao non poder executar a obra] e polo dano emerxente [os gastos xa realizados: a demolición das adegas e o muro, o peche, o valo, o guindastre, etcétera], que se acredita coas facturas».

O rexedor afirma que o promotor «expuña un prezo global pola expropiación, o lucro cesante e o dano emerxente, pero o secretario dixo que tiñan que ser dous procedementos distintos, primeiro o valor do chan e despois o resto, que terá que xustificar». O empresario ten claro que, se as contías non se adaptan «aos valores de mercado e ao que establece a Lei do Solo», recorrerá á vía xudicial.

---

---

---