Amplo despregamento con tres helicópteros e unha avioneta en Cabanas, ante un dos primeiros incendios da tempada
FERROL
A Consellería do Medio Rural mobilizou eses efectivos aéreos e cinco motobombas para controlar o lume orixinado esta tarde, a limpeza do monte axudou de devasa
01 abr 2025 . Actualizado á 18:05 h.No lugar de Punxeiro, en Cabanas, un amplo despregamento de efectivos forestais da Xunta acaba de controlar un dos primeiros incendios da tempada. Iniciouse nunha cuneta e rubiu polo monte xunto á estrada. Segundo indican desde a Consellería do Medio Rural, ata alí desprazáronse tres helicópteros, unha avioneta e cinco motobombas ademais do persoal.
Dous dos helicópteros encargábanse da descarga de auga ou retardantes, e o terceiro da coordinación. Ao equipo aéreo engadiuse un avión de carga en terra. Segundo testemuñas do incendio, puido ser orixinado polo disco de freo dun transporte que acabou nunha cuneta pero iso terá que ser investigado. A limpeza do monte axudou de devasa.
Desde a Consellería do Medio Rural informan que «o lume iniciouse ás 14.54 e estabilizouse ás 16.45, agora está controlado». Acudiron ademais dous axentes, catro brigadas e un técnico, xunto ás cinco motobombas nos medios terrestres. A Consellería do Medio Rural lembra que, como ocorreu neste caso, «unha boa xestión de biomasa axuda» a unha menor propagación dos incendios.