«A axuda para comprar a miña casa foi rápida; nunha semana tiña o diñeiro na miña conta»

A compra da primeira vivenda para os menores de 35 anos conta con incentivos autonómicos que axudan a tapar o buraco económico que supoñen as operacións inmobiliarias. En cifras, a convocatoria do 2021 de axudas a mozas en municipios de menos de 5.000 habitantes saldouse na provincia da Coruña cun total do 33 subvencións concedidas en 18 concellos, por un importe global de 243.360 euros. Supón un 30,4 % da dotación total no conxunto de Galicia para este concepto, que acadou os 800.000 euros. O orzamento esgotouse, polo que a Xunta considera as partidas como unha medida acertada que, de feito, repetirá este ano, ampliando o ámbito aos municipios de ata 10.000 habitantes.

A contía máxima da subvención por solicitante é de 10.800 euros.

«Como moito, dúas horas»

Sara Naveiro (Touro, 1987) foi unha dos 33 beneficiarios da provincia o ano pasado. Entrou polos pelos na convocatoria, ao quedarlle só un mes para os 35. Traballa como dependenta nunha panadería da localidade, cuxa poboación rolda os 3.500 habitantes. «A entrega de chaves foi o 26 de abril e, recórdoo ben, na tarde de San Xoán xa tiña os cartos na miña conta», relata.

Sara comprou un piso duns 110 metros cadrados: «Era unha vivenda vacacional, practicamente sen uso; os donos apenas viviron nela. Mirei en Arzúa e en Santiago, pero saíaseme de prezo. Na miña situación actual, non teño parella, mirei outras zonas, pero evidentemente o costo do metro cadrado aquí en Touro non é igual que en Santiago». Así que, unha vez concedida a hipoteca, tramitou a axuda a través do Concello: «A min concedéronme a cantidade máxima, 10.800 euros. A miña vivenda non supera os 100.000 euros». «Non te saca de ter que pagar unha letra dunha hipoteca, pero dáche ese pequeno colchón do primeiro ano, que quedas practicamente pelado. Ademais os cartos que che dan quedan aquí», subliña.

Dos tempos administrativos, a moza destaca a axilidade do proceso: «O que puiden perder en tramitar a axuda, como moito, foron dúas horas». «Ó estar nun concello pequeno, coñecémonos todos, o trato é persoal», valora. Por iso anima a outros mozos a mirar fóra das municipios medianos ou cidades: «O rural hoxe en día non está incomunicado como hai uns anos. Vimos na pandemia as súas vantaxes. Animo a que a xente nova compre no rural».

Sen esperas

Marcos Pérez (Cariño, 1995) lanzouse o ano pasado á compra dunha casa enteira: «Ten baixo, primeiro, segundo e ático», a uns 100 metros cadrados por planta. Autónomo, axente de seguros, afrontou a operación el só: «Estaba de alugueiro e decidinme a comprar. Xa sabía que había axudas». Igual que Sara, Marcos percibiu o máximo, isto é, 10.800 euros.

O municipio da comarca de Ortegal ten uns 3.700 veciños, e outros dous residentes menores de 35 anos percibiron a subvención autonómica, xestionada pola Consellería de Medio Ambiente, Territorio e Vivenda.

Marcos realizou os trámites a través dunha xestoría. «Só tiven que achegar as escrituras e o certificado de empadroamento. Foi súper rápido. Á semana seguinte xa tiña o diñeiro na miña conta. Non tiven que agardar», asegura.

A nova convocatoria para adquisición de primeira vivenda inclúe municipios de 10.000 habitantes

 

 

A Xunta de Galicia destinará este ano máis de 1,5 millóns de euros a través dunha nova convocatoria do programa de axudas dirixido a menores de 35 anos que opten por comprar a súa vivenda habitual nalgún dos concellos de menos de 10.000 habitantes. Segundo o Goberno autonómico, ese é o orzamento mínimo garantido para esa liña de subvencións, que desde a súa posta en marcha no ano 2018 «tivo unha gran acollida entre a xuventude galega».

A conselleira de Medio Ambiente, Territorio e Vivenda, Ángeles Vázquez, participa nas últimas semanas nos encontros informativos #ConstruíndoFogar que organiza o seu departamento e que seguirán percorrendo varias comarcas galegas para dar a coñecer entre os seus potenciais beneficiarios o conxunto de liñas de subvencións en materia de vivenda que se convocarán no 2022.

Nun deses encontros, desenvolvido en Lugo, Ángeles Vázquez subliñou a «gran oportunidade que suporá para Galicia a trintena de programas de axudas e incentivos que xestionará a Xunta este ano e que permitirán poñer á disposición de particulares, concellos e promotores máis de 150 millóns de euros para actuar no eido residencial». Por iso a conselleira anima aos representantes municipais, empresarios e profesionais de distintas ramas do sector a «aproveitar estes fondos e axudar tamén á Xunta na súa difusión co fin de garantir que cheguen ao maior número posible de beneficiarios».

Con respecto ás axudas para a compra de vivenda dirixidas aos menores de 35 anos, Vázquez detallou que se prevén, de novo, incentivos de ata 10.800 euros que favorecerán ao asentamento da mocidade en zonas de Galicia cun menor dinamismo demográfico. Así, a Consellería estima que as subvencións estarán dispoñibles para os mozos no 82 % dos municipios da Comunidade, xa que 257 concellos teñen menos de 10.000 habitantes.

Outras axudas

De forma complementaria a este tipo de incentivos económicos, a Xunta anunciou a súa intención de «seguir impulsando actuacións directas para incrementar o actual parque público residencial, sobre todo en municipios que concentran unha maior demanda». De feito, os fondos destinados á compra da primeira residencia para menores de 35 anos son compatibles con outras axudas habilitadas, como poden ser as destinadas á recuperación e rehabilitación de inmobles.

Máis de 7.000 euros de media

Na convocatoria do 2021, que contemplaba os municipios de menos de 5.000 habitantes, a contía máxima tamén era de 10.800 euros por vivenda. Concedéronse un total de 33 axudas na provincia da Coruña, repartidas en 18 municipios. A media por cada beneficiario acadou os 7.375 euros.

O Concello que máis obtivo foi Curtis, con catro beneficiarios. En Cariño, Corcubión, Fisterra e Touro deuse o visto a tres expedientes en cada un, mentres que municipios como Muxía, Paderne, San Sadurniño e Toques foron dous, respectivamente, os que conseguiron as bolsas.

Tamén se beneficiaron propietarios de Boqueixón, Cabanas, Carnota, Laxe, Monfero, Rois, Santiso, Trazo e Zas, cunha vivenda subvencionada en cada concello citado.

AXUDAS do 2021

• MENOS DE 5.000 RESIDENTES
• Concello Beneficiarios

Boqueixón 1

Cabanas 1

Cariño 3

Carnota 1

Corcubión 3

Curtis 4

Fisterra 3

Laxe 1

Monfero 1

Muxía 2

Paderne 2

Rois 1

San Sadurniño 2

Santiso 1

Toques 2

Touro 3

Trazo 1

Zas 1

Total 33

Importe 243.360 euros

Fonte: Xunta de Galicia

---

---

---