A chegada de Fernando Alonso a Aston Martín pode converter á escuadra británica nun equipo gañador segundo Mohamed Ben Sulayem, presidente da FIA.
11 ene 2023 . Actualizado á 12:12 h.Do mesmo xeito que Fernando Alonso ou que Pedro Martinez de la Rosa, o presidente da FIA considera que Aston Martin está a dar os pasos adecuados para ser un equipo campión. Aínda que Red Bull e Ferrari, ou incluso Mercedes, están a día de hoxe por diante da escuadra británica, en dúas ou tres anos podería non ser así segundo Mohamed Ben Sulayem.
Durante a súa visita ao Dakar, o presidente da FIA mostrouse confiado en que o abano das vitorias se abra a novos equipos. «Agora a diferenza entre algúns equipos é grande, pero temos que asegurarnos de que o tope de presuposto permita aos pequenos achegarse aos grandes», manifestou.
Cuestionado abertamente por Aston Martin e por se poderá loitas polo Mundial en dous ou tres anos, Mohamed Ben Sulayem sinalou: «Sobre o papel deberían poder facelo. O seu investimento é forte e teñen a un piloto intelixente como Fernando Alonso. Creo que si poderán... pero gañar é moi difícil. Mira Ferrari. Non gañaron pero non porque sexan lentos, senón pola fiabilidade, pola xestión, ou por todo xunto»
«Aston Martin non ten problemas de presuposto. Quizá necesita cambiar cousas e Lawrence Stroll está ás cambiar cun novo piloto, novo persoal... e isto tamén é importante», engadiu o presidente da FIA.
Fernando Alonso, igual de optimista que o presidente da FIA
Na mesma liña que Mohamed Ben Sulayem, Fernando Alonso explicaba así a súa fichaxe polo equipo británico: «Do que había, Aston Martin é un deses equipos que poden lograr ese obxectivo en dous ou tres anos. Iso é importante á miña idade. Mentres haxa só un un por cento de posibilidades de gañar o título novamente, seguirei adiante. E se non funciona como piloto, quizais nun papel fóra do coche. Se logo nos convertemos en campións do mundo, iso tamén me daría satisfacción, porque entón podería dicir que axudei a construílo. Estou feliz de comezar un novo proxecto e facelo exitoso canto antes».
O que tamén se incorporou a Aston Martín, no seu caso como embaixador da escuadra, é Pedro Martínez de la Rosa, que non ten ningunha dúbida de que o equipo será campión. «O que ve Fernando e o que vemos os que estamos dentro do equipo son as aspiracións que teñen, os cambios, as ferramentas, o túnel de vento novo, simulador novo, fábrica nova... É todo moi esperanzador», manifestou é español. «Sei que Aston Martin gañará, non teño ningunha dúbida, pero non sei cando», agregou optimista Pedro Martínez de la Rosa.
O obxectivo de Fernando Alonso en 2023
No que se refire ao futuro inmediato de Aston Martin, Mike Krack, xefe da escuadra, confía en dar un paso adiante en 2023. «Rematamos sétimos a tempada pasada. Iso debería ser mellor o próximo ano, temos que dar un paso adiante», declarou en RacingNews365.
«Creo que sería atrevido dicir que queremos loitar polas primeiras posicións o próximo ano, iso é demasiado ambicioso e pouco realista, pero queremos dar un paso significativo. Cos pasos que demos ata o de agora e coa fichaxe de Alonso, podemos logralo», xustificou.
Para finalizar, concretando un pouco máis o obxectivo, Mike Krack sinalou: «Este ano presenciamos unha bonita batalla polo cuarto lugar no campionato entre Alpine e McLaren. Se podemos meternos nesa pelexa, sería un gran paso».
