Sumar promete a creación de microrresidencias para acoller a un tope de 45 maiores ou dependentes

A taxa de envellecemento sobe como unha onda en Galicia ata guindar as seguintes cifras: por cada 100 menores de 16 anos hai 207 persoas que xa superaron os 64 anos de idade. Os maiores centran gran parte das propostas políticas nesta campaña. E nun Encontro polos Dereitos Sociais, celebrado esta mañá en Santiago de Compostela, Sumar Galicia adiantou unha das súas medidas máis importantes. Comprométese a crear microrresidencias para acoller a un tope de 45 maiores ou dependentes, se chega á Xunta. Como explicou a candidata Marta Lois, «queremos cambiar un modelo asistencialista, anacrónico e tutelado por outro sociocomunitario e de proximidade, con microrresidencias cun tope de 45 prazas para maiores ou persoas en situación de dependencia».

Lois volveu estar acompañada do ministro de Dereitos Sociais, Consumo e Axenda 2030, Pablo Bustinduy, que acudía por segunda vez a Galicia nesta campaña. Ante colectivos do sector, Bustinduy presentou «a nosa ambiciosa axenda do Gobierno central para unha transformación do modelo de coidados, co compromiso de implantar o 50% do financiamento por parte de Estado na dependencia». Pero a escasos días das eleccións, tocaban declaracións máis de batalla e dirixidas contra o PP. Segundo asegurou Bustinduy, «a Núñez Feijoo pasoulle nesta campaña o mesmo que nas xerais, desmanteláronse as súas mentiras, é o peor que lle pode pasar a un político... que diga unha cousa e faga outra». O ministro continuou lanzando dardos contra Feijoo, «porque mentres mobilizaba á xente, intoxicaba a vida pública e enfrontaba a uns españois con outros... negociaba todo o contrario».

Para o 18F, Bustinduy confía en «a mobilización da Galicia progresista que quere cambio, o voto de Sumar será decisivo e temos experiencia en coalicións porque son un síntoma dunha sociedade democrática». Enumerou logros gobernamentais como «a reforma do salario mínimo interprofesional, a reforma laboral ou a redución de xornada». E lanzou «unha mensaxe de esperanza e ánimo aos galegos».

Pola súa banda, a candidata Marta Lois apostou por «colocar os coidados no centro das polìticas tras 14 anos de desleixo e privatización por parte do PP, porque somos a segunda comunidade autónoma pola cola en investimento público en residencias e o 51 % das residencias galegas son privadas». E destacou que as mulleres galegas «sosteñen o coidado de crianzas, maiores e enfermos desde hai moitas xeracións, queremos construír un modelo público». Sumar Galicia tamén leva no seu programa a creación dunha empresa pública para o servizo de axuda a domicilio, «con salarios dignos para esas traballadoras», e outras medidas para os coidados como «dispositivos de proximidade, servizos de canguraxe e modelos de coidado interxeracional onde os nenos convivan con maiores». Con ese obxectivo, pide o voto para formar «un goberno progresista de mulleres, que teña en conta o ámbito rural e a dispersión poboacional».

Críticas por non estar no debate de RTVE

A candidata de Sumar tamén lamentou que a súa formación non estea invitada o debate que ofrece esta noite RTVE; no que participarán os candidatos de BNG (Ana Pontón) e PSOE (José Ramón Gómez Besteiro), e ao que decidiu non acudir o do PP (Alfonso Rueda). Segundo Lois, «iso non é un debate, senón a escenificación dunha conversa que non reflicte a realidade galega, moitos galegos non se sentirán identificados se non poden escoitar o noso programa». O ministro de Dereitos Sociais ademais foi preguntado polo simulacro de fichaxe do exministro de Consumo, Alberto Garzón, por unha consultora que finalmente non se produciu pola renuncia do propio Garzón. Para Bustinduy, «teño a mellor opinión posible de Garzón ao que lle agradezo como exerceu o seu liderado, é unha figura de referencia e toda a esquerda debería expresarlle o seu agradecemento... eu deséxolle sempre o mellor alá onde estea».

---

---

---