Ana Pontón reprocha ao PP os plans incumpridos no naval de Ferrol e para o AVE de Lugo
ELECCIÓNS GALEGAS 18F
«Queda unha semana para facer historia», advirte a líder dos nacionalistas
12 feb 2024 . Actualizado ás 05:00 h.Ana Pontón está decidida a ser o martelo pilón do PP nesta campaña. Un dispositivo que serve para propinar golpes de forma consecutiva, con perseveranza, ata dar coa forma desexada. Porque iso fixo en Lugo no mitin, repetir insistentemente a mensaxe lanzada pola mañá en Ferrol e nos últimos días en Ribeira, Vigo, Vilagarcía, Santiago e Tomiño: a chamada a ir casa a casa, a concentrar o voto na súa candidatura, a única con opcións de ser alternativa real ao PP.
En Lugo tamén afeou a Rueda as promesas incumpridas. «Recordades cando en 2009 dicían que ían construír o AVE de Lugo a Ourense con cartos da Xunta? Recordades cando dicían que se o PP gañaba se acababan os problemas en Alcoa? Recordades cando prometían a posta en marcha dun centro de emprendemento da industria aeronáutica porque Rozas ía ser a Citröen de Lugo?», preguntou Pontón ao auditorio de Lugo. Pola mañá houbo parada en Ferrol —por alí estaban tamén Feijoo e Zapatero —, o que deu pé á candidata a referirse ironicamente á «temporada alta de turismo electoral». Poucos lugares como Ferrol nos que teñan caído tantas promesas en saco roto. Tras a reconversión naval dos oitenta, decidida polo entón Goberno central socialista, a comarca nunca rematou de levantar cabeza do todo. A última cidade do eixo atlántico á que chegou a AP-9, que ten unha conexión ferroviaria doutro tempo e que conta cunha infraestrutura industrial infrautilizada. «Sabedes como lle chaman a Feijoo aquí? Míster Pemex. Lembrades? Non sei cantos barcos... Iso rematou nun fiasco e nun caso de corrupción; é iso o que temos que cambiar, a mentira como forma de facer política», advertiu a candidata ante un auditorio abarrotado, ao que lembrou de que queda «unha semana para facer historia».
Pontón sacou a lista de agravios e de promesas incumpridas polo PP na Xunta e contou que, xa no 2009, Feijoo expuxo un centro de reparación do naval, as rehabilitacións de barrios como Ferrol Vello ou A Magdalena e ata un centro de talasoterapia en San Felipe . No público estaban dous históricos, como Francisco Rodríguez, fundador do BNG e líder durante moitos anos da UPG, partido hexemónico da fronte, que chegou acompañado de Xosé Díaz, tío carnal da actual vicepresidenta do Goberno, Yolanda Díaz.