Elizabeth Duval e Marta Lois definen a Sumar como «a forza do arco da vella, fronte ao branco e negro do Partido Popular»

Santiago de Compostela, terra de liberdades polo seu espírito de acollida e universitario. Por ese carácter aberto e pioneiro, onde o Concello colgou por primeira vez na súa fachada a bandeira arcoiris en 2015, aquí celebra Sumar Galicia este mércores o seu Sumar Queer Fest (no Riquela Club) no que participará a actriz María Vázquez (Matria). E xa este mediodía organizou un encontro con colectivos LGTBIQ+ no centro sociocultural Maruxa e Coralia, ao que asistiu o portavoz de Feminismo, Igualdade e Liberdades LGTBi de Sumar. Elizabeth Duval quixo «darlle todo o apoio do mundo á candidata á Xunta, Marta Lois». E ambas as advertiron que o PP galego «iniciou unha perigosa senda da transfobia e a LGTBfobia, do mesmo xeito que o PP en toda España».

A escritora e activista Elizabeth Duval recalcou que «aínda que o PP galego en 2014 aprobou unha lei LGTB encamiñouse por unha senda perigosa que hai que parar». E apostou, do mesmo xeito que fixo Lois estes días, «por un cambio na Xunta coa entrada de Sumar e un goberno tripartito, porque o que fará Sumar por estes dereitos non o fará ninguén». Definiu á candidata de Sumar Galicia como «unha recoñecida académica feminista e unha investigadora brillante, que foi responsable de Igualdade en Santiago de Compostela». A profesora universitaria Marta Lois foi visitada precisamente neste acto por varios dos seus antigos alumnos E onda intelectuais como Marilar Aleixandre, recalcou que Sumar «é a forza do arcoiris frente ao branco e negro do Partido Popular». 

Ambas as acusaron ao PP de «recortar permanentemente dereitos LGTB a nivel estatal e galego, pondo en perigo conquistas como demostra a Lei Trans de Ayuso en Madrid». Duval quixo «desmontar o tópico de Galicia como país conservador, en Madrid tamén temos mala fama pero ningún destes territorios é conservador senón que somos loitadores». Alertou sobre as posturas «cada vez máis de retroceso en dereitos do PP». «Están botados ao monte e son radicais», abundou. E puxo como exemplo a Alberto Núñez Feijoo, «que en 2014 aprobaba a citada lei no Parlamento galego pero agora compra discursos de que a lexislación trans do Gobierno central é unha maquinaria de destrución social que provocará unha epidemia trans». Duval tamén lembrou que dentro do propio Gobierno, en alusión ao PP, «houbo persoas con declaracións infames sobre o colectivo como Carmen Calvo ou a actual directora do Instituto da Muller, Isabel García... nese equipo hai xente que hai dous días falaban das trans como falsas mulleres». 

Neste encontro con colectivos LGTBIQ+, a candidata de Sumar Galicia destacou que «no conxunto das forzas progresistas somos líderes en políticas valentes, todo o mundo sabe que somos pioneiros en poñer na axenda política esas necesidades e en denunciar as violencias LGTBfóbicas». Por isto, volveu insistir nun «cambio histórico o 18 de febreiro para construír un país onde a diversidade sexual sexa unha realidade».

Segundo Marta Lois, «o candidato do PP, Alfonso Rueda, nunca apostou como presidente por poñer recursos económicos para estes dereitos». A partir das necesidades evidenciadas nun informe do Consello da Cultura Galega (sobre as persoas lesbianas, gais, bisexuais, trans e intersexuais), Sumar incorpora ao seu programa «medidas culturais, laborais e de memoria polo dereito a estar con quen nos dá a gaña neste país». Segundo a candidata, «queremos un país multicolor para deixar atrás catorce anos de grises, e dun goberno que nega a alegría e a existencia dunhas persoas que son orgullo de país». 

---

---

---