A división do PP e o novo partido de Alfonsín achandan o camiño a Xabier Castro en Dodro

O próximo alcalde de Dodro parece cantado. O socialista Xabier Castro viu como o seu principal rival, o Partido Popular con Valentín Alfonsín á cabeza —quen foi rexedor do 2011 ao 2019— dividíase en dous. O outrora máximo dirixente do Concello viu como o seu partido lle movía a cadeira para colocar a Marisol Boga como candidata. Que non lle sentou ben o demostra que Alfonsín concorrerá ás urnas baixo un novo nome: Xente de Dodro.

Esa batalla dentro da familia conservadora parece que só terá unha salvación: que os votos de ambas as escisións acaden para gobernar e, sempre, que o PP apoie a Alfonsín para sacarlle a alcaldía a Xabier Castro. Os outros tres partidos que concorren nas eleccións son os que gobernan desde o 2019 o concello: PSdG-PSOE, con Xabier Castro á cabeza; BNG, con Xoán Bautista como referente; e Unidade Veciñal de Dodro, dirixido por Xoán Xosé Vicente.

Aínda que o PP foi o partido máis votado nos comicios do 2019, con 800 sufraxios, a unión dos tres permitiu sacar o bastón de mando aos conservadores. Con tres concelleiros socialistas, dous independentes e un nacionalista, a división do voto que se agarda na dereita achanda o camiño para que Xabier Castro continúe catro anos máis como alcalde.

---

---