Once positivos máis en centros educativos, xa hai un colexio e unha unitaria pechados e 22 aulas afectadas
EDUCACIÓN
Na xornada de onte reportáronse casos na Coruña, Dodro, Marín, Ourense, Santiago, Vilagarcía e Vigo
17 sep 2020 . Actualizado ás 18:25 h.O conselleiro de Educación fixo onte o balance de situación do covid-19 na escola galega: 29 persoas con positivo -metade alumnos, metade traballadores- que afectan a once aulas e un colexio enteiro (Calasancio, de Pontevedra) pechados para evitar a transmisión do virus. Os datos do conselleiro -que só se refiren aos centros de Educación, é dicir, non inclúe as escolas infantís (garderías)- quedaron obsoletos ao longo do día.
Durante a xornada detectáronse 11 novos positivos nas aulas galegas, que afectan a 10 colexios e escolas infantís da Coruña, Dodro, Marín, Ourense, Santiago, Vilagarcía e Vigo.
A prevención para evitar contagios supuxo o peche dunha escola, a unitaria de Chenlo, do CRA de Dodro. Alí unha nena de 5 anos deu positivo e como se trata dun grupo de 15 nenos que vive en estreito contacto tívose que pechar o centro.
Na Coruña, pola súa banda, hai tres colexios públicos con aulas pechadas: o CEIP Ramón da Sagra, onde dous irmáns (de infantil e primaria) deron positivo en coronavirus, o que obrigou a illar aos seus dous grupos; e no CEIP Juan Fernández Latorre un neno de infantil enfermou e están en corentena os seus 12 compañeiros. Ademais, en Ourense, no CEIP Mestre Vida enfermou unha monitora do comedor, que non estaba en contacto con nenos.
O resto de centros rexistrados onte son dúas escolas infantís públicas e catro privadas: Salgueiriños e Marín, así como na Coruña, Marín, Vilagarcía e Vigo. Na escola santiaguesa o positivo dun neno obriga a facer corentena a 13 compañeiros e 7 monitoras, pero o centro non pechou; na gardería da Casa do Mar de Marín foi unha profesora a que deu positivo e agora están en corentena os seus oito alumnos.
Pola súa banda, a patronal das escolas infantís privadas Agadei comunicou catro positivos en centros da Coruña, Marín, Vigo e Vilagarcía; pecháronse aulas nos tres primeiros centros, non no último. Desde Agadei preferiuse non facilitar o nome das escolas.
A estes casos hai que sumar os aparecidos o martes e que afectan a sete centros de Galicia.
