As empresas galegas poderán acceder a préstamos de ata un millón de euros para paliar os aranceis
ECONOMÍA
A Xunta dotará a liña de créditos con 50 millóns de euros
16 jun 2025 . Actualizado á 21:14 h.As empresas con centros de decisión en Galicia que manteñan operacións comerciais cos Estados Unidos superiores a 100.000 euros anuais ou superen o 10 % das súas vendas nese mercado, poderán optar a créditos da Xunta de ata un millón de euros para afrontar os aranceis do 20 % establecidos polo presidente Donald Trump.
O presidente da Xunta, Alfonso Rueda, explicou onte que os préstamos poderán chegar a un millón de euros por compaña e terán condicións vantaxosas como un prazo de ata doce anos e unha carencia de catro, «o dobre do habitual». O tipo de interese poderá ser fixo ou variable.
A liña de crédito contará cun presuposto de 50 millóns de euros e encádrase no plan de financiamento empresarial de Galicia. O Goberno galego calcula que o volume dos créditos poderá acadar este ano os 10 millóns. O cálculo parte do volume de operacións comerciais cos Estados Unidos durante o ano pasado.
A conselleira de Economía e Industria, María Jesús Lorenzana, explicou que as axudas se outorgarán mediante o sistema de concorrencia non competitiva. As solicitudes poderán presentarse ata o 1 de decembro ás 14 horas.
Esa liña sumarase a sete xa existentes. Trátase de préstamos directos dirixidos a proxectos de investimento de máis dun millón de euros, concentración de empresas, desenvolvemento tecnolóxico e de innovación, transformación e comercialización de produtos de pesca, acuicultura e industria manufactureira, internacionalización de empresas, operativa da industria auxiliar á construción naval e actuacións de centros tecnolóxicos, asociacións, fundacións e entidades con actividades orientadas á investigación e o desenvolvemento.
A nova liña de préstamos pretende financiar o circulante a longo prazo, de forma que as empresas afectadas polos aranceis poidan afrontar esa situación e abrirse a novos mercados.
Ademais a Xunta porá en marcha outras medidas para minorar o impacto da decisión do presidente estadounidense. Lorenzana explicou que se intensificará o diálogo xa existente co tecido empresarial para analizar a afección ás compañas galegas.
Tamén se creará un servizo de consultoría especializada en materia de internacionalización vinculado ao programa Reacciona do Igape. Ese servizo proporcionará ás empresas apoio técnico e orientación profesional para avaliar o seu potencial exportador e trazar unha estratexia de saída ao exterior.
Ademais, a través da Oficina Económica de Galicia, e en coordinación coa antena do Igape en Miami, ofrecerase outro servizo de asesoramento para atender as empresas galegas de forma directa, trasladando a información que necesiten e canalizando as súas consultas.
Lorenzana lembrou que a internacionalización é clave para o tecido empresarial galego, que o ano pasado superou os 31.000 millóns en exportacións, das que as realizadas a Estados Unidos copan o 2,58 % do total. Só en marzo deste ano acadaron os 52,84 millóns de euros, un 40,6 % máis que hai un ano. A previsión da Xunta é que os aranceis supoñan unha perda de 160,3 millóns.