Hereu reitera que o proxecto de Altri tramitarase como todos, «con plena obxectividade»
ECONOMÍA
Yolanda Díaz oponse a que se financie con fondos europeos
27 mar 2025 . Actualizado á 18:57 h.O proxecto de Altri para instalar unha fábrica de celulosa e fibras téxtiles no concello lucense de Palas de Rei continua xerando polémica, tanto política como social. O ministro de Industria e Turismo, Jordi Hereu, reiterou este mércores que o seu departamento o tramitará «como calquera outro proxecto industrial» e farao «con plena obxectividade».
«Quero reiterar que, como Ministerio de Industria, tócanos xestionar e tramitar os expedientes que nos chegan. Son actos regrados», destacou, insistindo en que o seu departamento «avalía con rigor, con obxectividade, os proxectos industriais».
Fixo referencia, ademais a que «este caso está sometido a un gran debate social, político en Galicia», en referencia ao rexeitamento frontal da súa formación na comunidade e do BNG á instalación da macrofábrica, así como á manifestación celebrada a pasada fin de semana na Pobra polo mesmo motivo.
Tamén a vicepresidenta segunda do Gobierno e ministra de Traballo, Yolanda Díaz, pronunciouse sobre Altri. Fíxoo nun foro sobre os fondos europeos. Na súa intervención criticou que a Xunta queira financiar o proxecto de Altri con fondos europeos a pesar de que, ao seu xuízo, ameaza con destruír «moitísimos máis empregos dos que creará».
«Vai destruír centenares de miles de postos de traballo e de empresas na comunidade autónoma de Galicia», advertiu a responsable de Traballo, que tamén alertou do impacto ambiental do proxecto.
Vázquez pide respecto
Ante este escenario, a conselleira de Medio Ambiente da Xunta, Ángeles Vázquez, dixo comprender e respectar a «lóxica» preocupación social —en referencia á manifestación do sábado— polos «contos» lanzados polo BNG «e os seus satélites» sobre o proxecto de Altri, do que insistiu que «nin é altamente contaminante, nin nos imos a quedar sen auga e non vai chegar absolutamente nada á ría [de Arousa]».
Así, Vázquez volveu pedir «respecto» polo labor dos técnicos que elaboraron o informe favorable. «Cando un técnico fai un informe, sexa favorable ou desfavorable, está a cumprir estritamente a lei». «Non é posible que se equivoquen máis de 40 técnicos, que son especialistas e que sacan de media 220 DÍA (declaracións de impacto ambiental) ao ano. Van equivocar nesta e non no resto?, inquiriu.