O Instituto para a Diversificación e Aforro da Enerxía asegura que España foi un dos países que máis PIB perdeu como consecuencia do cambio climático
26 oct 2024 . Actualizado á 19:30 h.O director do Instituto para a Diversificación e Aforro da Enerxía (IDAE), Joan Groizard, asegurou este sábado en Ferrol, na xornada Transición ecolóxica, retos e oportunidades para Galicia e Europa, organizada polos socialistas europeos, que España foi un dos países que máis produto interior bruto (PIB) perdeu como consecuencia do cambio climático. Para reverter esa situación e lograr con éxito a transformación cara a fontes renovables, o Goberno central impulsou unha estratexia de transición enerxética que, en Galicia, apoiou a posta en marcha de 168 proxectos que mobilizan investimentos por valor de 636 millóns e con axudas por preto de 200. Así, explicou que cinco investimentos irán destinadas á produción de hidróxeno renovable; outras 24 a repotenciar parques eólicos e centrais hidroeléctricas; 6 a tecnoloxías de mobilidade sostible e outras tantas a comunidades enerxéticas. Ademais, anunciou a posta en marcha de cinco oficinas de transformación comunitaria en Galicia.
Nas xornadas, o líder dos socialistas galegos, Ramón López Besteiro situou á transición enerxética como «unha oportunidade para a industria e o emprego», despois de incidir en que os últimos 15 anos de Gobierno da Xunta estiveron marcados polo parón nunha planificación ordenada das renovables. Empresas e expertos de distintos ámbitos, como o coñecemento, a ecoloxía e o sindical, abordaron os distintos desafíos e as oportunidades que aprecian na transición enerxética e tamén as súas demandas.
O eurodeputado socialista Nicolás González Casares situou un dos fitos para o despregamento das enerxías verdes en maio do 2025, data na que teñen que estar definidas as áreas de aceleración das renovables. Son, explicou, «aqueles lugares do territorio onde máis coinciden os recursos renovables e onde hai menos problemas de afeccións», polo que os proxectos contarán cunha tramitación simplificada.
Plan de eólica mariña flotante
González Casares, organizador do encontro, incidiu en que Galicia ten moito que dicir en dous dos programas que vai impulsar a UE, o Pacto industrial Limpo, e no Plan de Electrificación. Ademais, anunciou que reclamará no Parlamento europeo «un plan estratéxico da eólica off-shore flotante, que sirva de impulsor do sector e tamén de fonte de coñecemento».
Do potencial de crecemento desta industria deu conta o delegado en Galicia de Iberdrola, Francisco Silva, quen incidiu en que o sector ocupa a 3.000 traballadores na comunidade «sen que haxa nin un só parque».
A pesar de que as posibilidades de expansión laboral, económica e social que expón a transición enerxética, aínda existen importantes freos. Como a demanda de «certeza xurídica», exposta por Cristina Pedrosa, avogada da Asociación Eólica de Galicia (EGA), en alusión ao parón xudicial que experimenta o sector, e tamén por Juan Castro Gil, da Asociación Nacional de Produtores e Investidores de Enerxía Fotovoltaica.
Tamén o desenvolvemento dunha planificación tanto para conseguir os obxectivos enerxéticos como climáticos, e para compasar a descarbonización coa transformación da forza laboral en xigantes como a automobilística Stellantis. E todo iso, conscientes de que sempre hai pasos atrás. Como subliñou Groizard, a guerra de Ucraína xerou tantas emisións como as de 175 países xuntos nun ano.
A axuda europea para o plan de amoníaco verde de Forestal, pendente de respaldo en España
O director financeiro de Forestal do Atlántico, Alberto López, explicou nas xornadas que, tras superar a declaración de impacto ambiental do seu proxecto Triskelion sen unha soa alegación, cos trámites para a súa aplicación xa culminados e a piques de obter a licenza de obras, o investimento para a produción de amoníaco verde nas súas instalacións de Mugardos enfróntase a unha barreira que están a intentar resolver. Despois de ser receptores dunha subvención europea, que a empresa considera necesaria para a sustentabilidade do proxecto, non logrou ese mesmo respaldo a nivel nacional. E o problema é que, explicou Alberto López, un dos requisitos que impón a UE para a concesión desa subvención é «que unha parte ténnolo que dar o noso país e aí atopámonos o problema: en España non conseguimos ningunha». Neste sentido, incidiu en que, pese ter os permisos, as infraestruturas e unha actuación deseñada de forma competitiva, «se non conseguimos fondos en España, o proxecto non sae». No entanto, anunciou que intensificarán co seu traballo para «convencer as administracións nacionais e rexionais de que o noso proxecto é bo pero necesita de apoio».
Forestal do Atlántico, pertencente ao Grupo Gadisa, investirá 181 millóns en Triskelion.