Consumo inspeccionará a venda «en liña» para detectar falsas rebaixas de verán

O Ministerio de Dereitos Sociais, Consumo e Axenda 2030 anunciou que reforzará a monitoraxe de prezos de produtos que se vendan en liña para as rebaixas de verán que adoitan arrincar a mediados de xuño para así poder detectar posibles fraudes nas ofertas.

Así o anunciou o Ministerio, encabezado por Pablo Bustinduy, que tamén informou da apertura de expedientes sancionadores a dous grandes operadores de comercio electrónico por presuntas rebaixas enganosas no último Black Friday, que se unen aos que abriu hai 15 días a outras dúas empresas de compra en liña.

Segundo o artigo 20 da lei do comercio minorista, sempre que se oferten artigos con redución de prezo deberá figurar con claridade, en cada un deles, o prezo anterior para poder comparalos correctamente.

A lei tamén establece que o prezo anterior debe ser o prezo menor que fose aplicado sobre produtos idénticos nos trinta días precedentes.

Na investigación que deu lugar a estes dous novos expedientes detectouse que entre o 18 e o 19 de novembro ofertábanse unhas zapatillas deportivas por 29,99 euros, un día despois subiuse o prezo a 48,95, e o 24, coincidindo co Venres Negro volveu baixar o prezo outra vez aos 29,99 euros.

É dicir, que se os consumidores non comprobaron os prezos anteriores pensaron entón que podían adquirir un produto cunha rebaixa importante, algo que non se corresponde coa realidade xa que se elevou o seu prezo nos días previos.

Estas prácticas comerciais poden considerarse desleais cos consumidores e poderían supor unha infracción grave da lei en defensa dos mesmos que podería carretar multas de ata 100.000 euros, cantidade que se pode exceder ata acadar entre catro e seis veces o beneficio ilícito obtido

---

---

---