Prima o maior prezo desta oferta, de 11 euros por acción, fronte aos 10,65 de Apollo
03 abr 2024 . Actualizado ás 21:33 h.O consello de administración de Applus (a empresa concesionaria do servizo de Inspección Técnica de Vehículos en Galicia) aprobou onte senllos informes sobre as dúas ofertas públicas de adquisición (opas) presentadas pola compaña por parte dos fondos Apollo e Amber.
O consello de Applus emitiu unha opinión favorable sobre ambas as opas, por unanimidade dos seus membros nos dous casos, aínda que lembra que o prezo final da opa de Amber, de 11 euros por acción (inicialmente ofrecera 9,75) é superior ao ofrecido por Mazá Spain Bidco (sociedade instrumental de Apollo), que comezou ofertando 9,5 euros e logo elevou a poxa a 10,65.
Por este motivo, o consello informa que se acollerá á opa de Amber para vender as 7.971 accións propias en posesión da compaña, e que o mesmo farán os conselleiros que posúen títulos da empresa. Só en segundo caso, de non prosperar a oferta de Amber (que está condicionada á aceptación de polo menos o 50 % do capital social), acudirán á opa de Apollo.
En calquera caso, o informe lembra que «corresponde a cada accionista da sociedade decidir se acepta ou non» cada unha das opas, «tendo en conta os factores que considere pertinentes, incluídas as súas circunstancias e intereses particulares».