O Alto Tribunal xa ratificara a aprobación provisional do mesmo proxecto
02 feb 2024 . Actualizado ás 19:19 h.A Sala do Contencioso-Administrativo do Tribunal Supremo volveu a pronunciarse, un mes despois de emitir a primeira sentenza, sobre os permisos para a repotenciación do parque eólico de Corme , acometida por EDP Renovables. Emitiu un fallo no que avala o acordo adoptado o 7 de novembro do 2019 pola Xunta, no que aprobou definitivamente o proxecto. Esa luz verde fora recorrida por un particular, e froito desa acción, o Tribunal Superior de Xustiza de Galicia (TSXG) anulara o acordo, en xaneiro do 2022.
Agora, o alto tribunal considera a autorización axustada a dereito, ao estimar os recursos da Xunta de Galicia, de EDP e da Asociación Eólica de Galicia contra a sentenza do TSXG. Baseouse nos mesmos argumentos que os recolleitos na sentenza de finais do pasado decembro, na que considerou tamén a aprobación provisional do mesmo proxecto.
O Supremo determinou nas súas sentenzas que non concorrían as causas de anulación dos acordos que sostivo o TSXG, relacionadas co trámite de información pública no procedemento de avaliación de impacto ambiental, e que non se contravino nin a directiva europea sobre avaliación de repercusión de proxectos públicos e privados sobre o medio ambiente, nin a Lei 21/2013 de avaliación ambiental.
Neste sentido, non estima o argumento de indebida redución á metade do prazo de alegacións —de 30 a 15 días— nin tampouco que os informes sectoriais deberon solicitarse antes de someterse o proxecto e o estudo ambiental ao trámite de información pública. Esas dúas premisas foron utilizadas noutros fallos similares ditados pola Sala Terceira do TSXG, un tribunal presidido por Francisco Javier Cambón do que forman parte os maxistrados Cristina María Paz, Juan Carlos Fernández, María de los Ángeles Braña e Luis Villares , que foi candidato á Xunta por En Marea e logo reincorporouse á carreira xudicial. Trátase dunha sección que foi noticia por un goteo de sentenzas adversas para o sector eólico. Nalgúns casos estas implicaron a adopción de medidas cautelares, o que levou á paralización dos proxectos.
Sete aeroxeradores
Mediante esa actuación, a mencionada compaña enerxética substituíu os 61 aeroxeradores cos que contaba o parque por 7 de maior potencia e envergadura, ademais de mellorar a infraestrutura viaria. «O Supremo ratifica a legalidade no procedemento tramitador por parte da Xunta para o desenvolvemento dos eólicos, e agora a Xunta confía en que este reforzo xudicial axude a concretar proxectos cara ao ano 2025, cando todos os parques autorizados en 2023 comecen a entrar en funcionamento», subliñou a conselleira de Economía, María Jesús Lorenzana. Ademais, engadiu, que seguirá traballando polo sector «a través dunha tramitación ambiental, ordenada e garantista que someta todos os proxectos eólicos a avaliación ambiental ordinaria» para que só os viables poidan acometerse.