España, cun 3,2 %, rexistra un diferencial de prezos desfavorable
30 novs 2023 . Actualizado ás 12:00 h.A taxa de inflación interanual da zona euro moderouse en novembro ao 2,4 %, medio punto porcentual por baixo do dato do mes anterior e a súa lectura máis baixa desde xullo do 2021, segundo a estimación preliminar da oficina comunitaria de estatística, Eurostat.
A moderación da escalada dos prezos na zona euro obedeceu principalmente á caída do 11,5% no custo da enerxía, fronte á baixada do 11,2% de outubro.
Por contra, o encarecemento dos alimentos non procesados en novembro acelerouse ao 6,4 % interanual desde o 4,5 % anterior.
No caso dos servizos, os prezos subiron un 4 % interanual, seis décimas menos que en outubro, á vez que os bens industriais non enerxéticos abaratáronse outras seis décimas, ata o 2,9 %.
Ao excluír do cálculo o impacto da enerxía, a taxa interanual de inflación en novembro foi do 4,3 %, fronte ao 4,9 % do mes pasado, mentres que ao deixar fóra tamén o impacto do prezo dos alimentos, o alcol e o tabaco, a taxa subxacente de inflación moderouse ao 3,6 % desde o 4,2 % previo.
Entre os países da eurozona, Bélxica rexistrou por segundo mes consecutivo unha caída interanual da inflación, cunha lectura de -0,7 % en novembro, seguida de Italia e Finlandia, con taxas positivas do 0,7 % e do 0,8 %, respectivamente.
As maiores subidas dos prezos en novembro entre os países do euro corresponderon a Eslovaquia (6,9 %), Croacia (5,5 %) e Austria (4,9 %).
A freada na subida do custo da vida no conxunto da zona euro supón que España, cunha inflación interanual do 3,2 % en novembro, teña un diferencial de prezos desfavorable de oito décimas respecto da eurozona.