O bono Activa Comercio esgótase en menos de tres semanas e mobiliza 12,5 millóns de euros en vendas
ECONOMÍA
A Xunta destinou 2,5 millóns de orzamento ao plan de descontos, no que participaron máis de 7.000 establecementos
03 jun 2023 . Actualizado ás 18:23 h.Éxito rotundo da terceira edición do bono Activa Comercio, unha iniciativa da Xunta para promover as compras nos establecementos de proximidade da comunidade, ademais de suavizar o golpe da inflación nos consumidores. Os 2,5 millóns de orzamento destinado pola Consellería de Economía esgotáronse en menos de tres semanas, «contribuíndo a mobilizar preto de 12,5 millóns de euros en vendas nos máis de 7.000 establecementos de toda Galicia que se adheriron á iniciativa», segundo informou o departamento de Francisco Conde.
A principal novidade desta nova edición do bono é que, a diferenza das precedentes, non se limitou o número de usuarios que podían descargarse o bono (un por persoa), senón que, unha vez que se esgotou o orzamento para os mesmos (os citados 2,5 millóns de euros), os descargados xa non se poderán utilizar.
O funcionamento dos bonos, en formato QR, articulábase a través dunha aplicación móbil. O importe reducíase en función do valor da compra realizada, de modo que as iguais ou superiores a 20 euros pero inferiores a 30 tiñan un discuento de 5 euros, mentres que era de 10 para as que se movesen na pinza de entre 30 e 50 euros. A partir desa cantidade, a rebaixa era de 15 euros.