O xigante téxtil recoloca aos empregados afectados polos peches de tendas de menor tamaño
20 jun 2021 . Actualizado ás 10:06 h.Xa saben vostedes que Inditex está inmersa nun proceso de reestruturación de tendas. Absorbe (pecha) as máis pequenas noutras moito máis grandes, con posibilidades de incorporar toda aquela tecnoloxía que posibilite esa unidade do negocio online e presencial. Pois ben, o 9 de xuño do ano pasado anunciou que os peches, que levarían a cabo ata o 2023, afectarían a entre 1.000 e 1.200 establecementos en todo o mundo, e polo tanto aos persoais das mesmas. Cada trimestre, a compaña pon nome e apelidos (cadea á que pertencen, localización, número de empregados) aos establecementos que se integran nesa lista que manexa; e cada trimestre desde que comezou este programa, a alma dos traballadores encóllese (lóxico), á vez que parte deles -non todos- piden o seu traslado de tendas a loxística.
Por que? CC.OO. e UGT asinaron coa empresa un pacto polo mantemento do emprego -obxectivo fundamental- que ten tres camiños: 1.- A adscrición voluntaria a unha lista con oferta de postos de traballo (normalmente 2 por persoa) en todas as cadeas e mesmo en loxística e servizos centrais (a primeira vez que se conseguiu por parte dos sindicatos). 2.- Cambio forzoso garantindo as condicións laborais. 3.- Extinción voluntaria do contrato porque ao traballador non lle interesa continuar. Neste caso, segundo explica, Álvaro Cajigal, representante de UGT, a compaña abona unha indemnización de 45 días por 24 mensualidades, cantidade que é neta para o traballador (porque a empresa asume a tributación a Facenda).
O acordo recolle tamén que, por mobilidade xeográfica, o empregado ten dereito a 3.000 euros, máis cinco días libres por traslado. Ou se prefire, cobrar cada mes 0,19 euros por quilómetro cun máximo de 90 euros. O desprazamento, neste caso, ten que ser como mínimo de 25 quilómetros e páganlle desde o quilómetro 26. Súmanse os quilómetros ida e volta.
Se a poboación afectada polo peche ten un taxa de paro superior ao 15 % e o empregado acóllese á extinción, recibirá, ademais da indemnización, entre 3.000 e 7.500 euros en función da súa antigüidade.
Canto cobra un dependente dunha tenda de Inditex e un empregado base de loxística? Esta é a pregunta para entender as tensións que existen nestes momentos para a elección do posto. En tenda, un empregado ou empregada con cinco anos de antigüidade a xornada completa gana 19.000 euros ao ano, e se leva máis de 20 anos o seu soldo ascende a 20.200. Nestas cantidades están incluídos dous pluses (provincia e sede) e faltaría engadirlle as comisións por venda (teñen tantas variables que Cajigal asegura que son dificilísimas de explicar e entender).
En loxística -recepción de mercancía e distribución para as tendas- as vacantes son postos fixos-descontinuos e de quenda de tarde. Un traballador con cinco anos en persoal cobraría 21.500 euros en seis meses e outro con 20 anos, 24.500 tamén en seis meses. Os outros seis meses poden traballar noutro empresa ou se inscriben o paro.
De acordo cos datos que manexa Cajigal, todos os traslados se realizaron no perímetro provincial excepto en Ferrol e no caso dunha empregada que traballaba en Ourense e comezará en Santiago.