Naturgy e Endesa demolen a cheminea da planta térmica do Bierzo
26 novs 2020 . Actualizado ás 08:41 h.A cheminea é o símbolo das centrais térmicas. E a que irrompía nos ceos do Bierzo xa é historia. Naturgy e Endesa, donas da planta de carbón de Anllares do Sil (León), voaron polo aire a torre de 150 metros de altura, que humeó durante 36 anos, entre 1982 e decembro do 2018.
Para a demolición usáronse cincuenta quilos de explosivos e 200 detonadores eléctricos. Segundo Naturgy, esta técnica é unha das máis eficientes para o desmantelamento de centrais, xa que minimiza os riscos para os traballadores.
Unha vez realizada a voadura, os residuos de formigón e da estrutura metálica son recolleitos a nivel do chan. A empresa calcula que se recuperarán 3.550 toneladas de formigón que se destinarán, entre outros usos, ao recheo de ocos e regularización de terreos na propia instalación e 80 toneladas de ferro e aceiro que serán reciclados en acerías.
A térmica de Anllares empezou a ser desmantelada en xullo do 2019, cun orzamento superior a os oito millóns de euros.
Salvo sorpresa maiúscula de última hora, voar polo aire é o que lles agarda tamén ás chemineas das dúas centrais de carbón galegas. A de Naturgy en Meirama mide 204 metros; a de Endesa nas Pontes, 356.