O total de inspeccións no período 2007-2010 foi de máis de 18.200
30 jun 2011 . Actualizado á 12:03 h.A Axencia Comunitaria do Control da Pesca (ACCP) puxo en marcha o proceso de selección e inminente nomeamento dun novo director executivo. O procedemento culminará o 8 de xullo a través dun consello de administración extraordinario que se celebrará en Vigo, sede da institución, con vistas a que quen sexa a nova cabeza visible do organismo europeo coordine a integración da axencia nas novas hechuras da política común pesqueira (PCP), que entrará en vigor previsiblemente en xaneiro do 2013, unha vez que pase os filtros do Consello de Ministros e do Parlamento Europeo.
O que será novo número dous da institución -o presidente é o galo Sergé Beslier- substituirá en poucas semanas ao holandés Harm Koster, que onte se despediu de forma institucional, a pesar de que en realidade abandonará o cargo o 31 de agosto. Koster deixa tras de si un inxente labor que el mesmo comezou no mes de xuño do 2006 desde Bruxelas, nunha pequena oficina con só tres colaboradores. O novo director executivo, do que se sabe como é habitual nestas ternas que non será español, terá que levar as rendas da axencia para encaixala na nova política común de pesca, que aposta por proseguir, entre outras liñas mestras, na persecución e redución da pesca ilegal, o control das reservas de peixe en augas comunitarias, e en fortalecer, entre outras actividades, as de investigación e desenvolvemento destinadas á eficacia pesqueira, cun descarte cero no 2016, e á eficiencia enerxética das artes e os buques de pesca.
Irregularidades
Como balance estatístico, desde o ano 2007 ata o 2010, o número de inspeccións contabilizadas no seo dos plans de despregamento conxuntos -entre a Axencia de Pesca e os Estados membro- acadou os 18.295 rexistros, iniciándose o percorrido nas 1.184 inspeccións do primeiro ano da etapa cuatrienal, ata culminar nas case 7.400 do exercicio pasado. A cociente de infraccións sobre inspeccións foi caendo desde un 0,12 a un 0,04% no final do período computado. En números redondos, a cifra de irregularidades foi de 300.