O PP de Cruzamentos insiste nas «graves irregularidades» polas que levará ao goberno de Taboada ante a Fiscalía
VILA DE CRUCES
O PP de Cruzamentos nega «rotundamente» que o seu grupo estea en contra das obras que se realicen no municipio e asegura que en múltiples ocasións brindáronse ao alcalde para colaborar e axudarlle a conseguir financiamento doutras administracións «sempre que se fixesen os proxectos con rigor, transparencia e legalidade». Para os populares «o problema non son as obras, senón a maneira na que se están a executar». Achacan ao goberno local pretender xustificar as súas actuacións alegando que son obras solicitadas polos veciños cando «o que están facendo é certificar obras que non están executadas, pagar actuacións inacabadas ou que non están postas en marcha».
Aseguran que quixeron darlle unha oportunidade ao alcalde de dar explicacións no pleno pero despois da sesión, afirman, «nos queda outra que remitir toda a documentación á Fiscalía de Pontevedra». Consideran que se o rexedor tivese a conciencia tranquila «non estaría apurando nestes días a rematar a cabina do ascensor do auditorio de Gres e levando un xerador para probalo ou colocar barandillas, aínda que tampouco lle corresponde co certificado e que xa foran pagadas no 2023, como está ocorrendo coa ponte de Liñares, intentando tapar as irregularidades denunciadas polo noso grupo». Piden a dimisión de Taboada e o cesamento da arquitecta.
En canto á modificación de crédito aprobada coa abstención do BNG, o PP asegura que non está en contra das melloras, pero si «das chapuzas e da falta de planificación e legalidade». Pon como exemplo a reforma eléctrica do auditorio de Gres onde, din, instalouse un ascensor trifásico nun edificio sen esa tensión e que supón un erro que, explican, suporá 18.000 euros emendar, ou o cemiterio de Añobre que «non se poderá executar sen aprobar un Plan de Infraestruturas» e que conta, aseguran, cunha partida insuficiente «ou a varanda de Cumeiro que leva tres anos almacenada e agora pretenden volver a pagar e colocar». Por iso, consideran que a modificación de crédito «carece dunha visión de futuro para o desenvolvemento real do municipio».
En canto á ordenanza do IBI, o PP defende que unha das propostas tiña un informe técnico favorable e a outra non tiña informe en contra porque non se tramitou acusando o goberno cruceño de non querer iniciar o expediente insistindo que as propostas eran viables legalmente.