Ou enigmático cruceiro de Santo Antonio nun penedo dá parroquia de Fiestras (Silleda)

Este cruceiro do Santo Antonio, que se atopa amais dun penedal rodeado de carballizas na parroquia de San Martiño de Fiestras, no municipio de Silleda, tennos desconcertados. Presenta no anverso a clásica figura do Cristo crucificado, pero esta semella ter tres brazos, un deles —e perdóesenos o simil— coma se estivera sostendo un teléfono móbil para falar. Apelamos ao experto amigo Pablo Sanmartín para que nos dera unha opinión, e dinos que poida que o canteiro que o construíu, que non debía ser un gran artista santeiro, quixo envolver ao Cristo cun pano-sudario que colga tamén da cintura, sen lograr un bo resultado, aínda que si é ben orixinal e singular.

Non é o único enigma que atopamos neste cruceiro centenario que os paisanos coñecen como o cruceiro de San Antonio, razón pola que debería representar a este santo milagreiro no anverso. Pero reparando ben na figura, non lle atopamos moito parecido, malia o hábito que viste e o feito de que lle falte o inseparable Neno. Máis semella a Virxe do Rosario ca Santo Antonio.

O investigador de Silleda e amigo José María Ezequiel Ferrer, dinos que Santo Antonio é co-patrón de Fiestras e a imaxe pode ser a dun monxe bieito co seu hábito, e o que semella un rosario sería o cordón do hábito, do que colga a cruz de San Benito. Cabe sinalar que na parroquia tiveron os frades de Aciveiro unha tulla na casa do Arco do lugar de Maril, da que xa temos contado e que aínda se conserva nos nosos días.

O cruceiro que non figuraba catalogado, malia que os veciños máis vellos de Fiestras sabían ben del, atopámolo vai para vinte anos por un casual baixando do lugar de Currospedriños cara a Marín de Fiestras, a beira dun vello e importante camiño agora en desuso, na cima dun penedo, medio agochado polo mato e non reparamos ben nas figuras, daquela cubertas polos liques, conformando con facer unha foto ao conxunto.

Hai pouco tempo, fomos velo co noso irmán Suso, que reparou neste detalles e a amiga e veciña Marina Sanmartín, contounos que o cruceiro de Santo Antonio era moi antigo, que a súa nai que vai para os cen anos, xa acordaba oír falar del aos mais vellos da parroquia.

Para máis detalle, pedímoslle a Álex Negreira que lle fixera unhas fotogrametrías as dúas figuras que mostramos aquí, para ver a calidade do traballo do canteiro anónimo e se nos podía axudar a resolver o enigma, que malia todo semella que vai continuar.

---

---

---