Este martes, a Audiencia de Pontevedra celebrou a primeira das sesións do xuízo que sinta no banco a tres acusados, un veciño da Estrada, que supostamente distribuían cocaína nesta localidade pontevedresa, e dúas mulleres con domicilio en Vilagarcía e en Silleda. Esta última sería a persoa que «preparaba a cocaína e que a poñía a disposición» do primeiro, mentres que a arousá sería a responsable do seu transporte. Así o expón o fiscal no seu escrito de acusación, no que solicita cinco anos e nove meses e multa de 4.935 euros para o estradense, e catro anos e medio e 38.130 euros de multa para as súas compañeiras de banco.
Esta primeira xornada de vista oral estivo marcada, en gran medida, pola intervención do avogado do principal acusado, quen sostivo que o seu cliente foi vítima dunha investigación prospectiva, así como anunciou unha querela contra os axentes que levaron as dilixencias. De igual modo, solicitou a suspensión do xuízo, a nulidade das actuacións policiais, das intervencións telefónicas, das analíticas da droga intervida ao entender que houbo deficiencias na cadea de custodia das mesmas...
E fronte a este avogado, o fiscal defendeu o labor da Garda Civil á hora de acometer esta investigación. Así, remarcou que a mesma non se iniciou polo testemuño dunha persoa concreta, senón que existían indicios policiais baseados en vixilancias operativas que determinaron que os axentes inferisen que se podería estar a dedicar á venda de estupefacientes.
A estes indicios sumouse a existencia de denuncias previas contra o principal acusado, quen ten dúas condenas por delitos contra a saúde pública, así como, ao parecer, chegáronse a observar transaccións. No propio escrito de acusación precísase que se identificaron «catro puntos habituais de venda ou distribución próximos ao seu domicilio aos cales o acusado acudía nalgún dos seus vehículos para reunirse cos compradores e entregarlles a droga a cambio de diñeiro, logo de contactar con eles por teléfono ou por Whatsapp ou Telegram».
Ademais, puxo de relevo que non se puido determinar a orixe do diñeiro que posibilitou o alto nivel de vida do procesado, así como sostivo que non existiu irregularidade na cadea de custodia da droga. Argumento que estendeu ás pegadas dixitais achadas en dous paquetes que contiñan cocaína e que deron positivo nunha das procesadas.