A Xunta dota con 1,5 millóns de euros un grupo contra grandes incendios
18 novs 2022 . Actualizado ás 05:00 h.A conselleira do Mar, Rosa Quintana, e o conselleiro de Medio Rural, José González, inauguraron onte en Silleda a primeira feira Internacional de Seguridade, Defensa e Urxencias, Sedexpo. Unha cita que converte ao recinto da Feira Internacional de Galicia en escaparate da innovación. Un apertado programa traduciuse xa onte na celebración de máis de corenta conferencias e numerosas demostracións, presentacións e talleres.
Paralelamente celebrouse o Congreso Internacional de Incendios Forestais Interlumes, organizado por Medio Rural. Nel, a Xunta anunciou a dotación de 1,5 millóns de euros para a creación no 2023 dun grupo especializado para loitar contra os grandes incendios. A esta sumaranse, dixo o conselleiro José González, outras partidas como os 18 millóns de euros que se empregarán á recuperación integral das áreas afectadas por lumes forestais. A estas engadiu preto de 20 millóns de euros destinadas a melloras de infraestruturas do dispositivo antiincendios, 10 millóns de euros para o parque móbil ou 700.000 euros para impulsar a formación. Ao congreso asistiron tamén, entre outros, o director xeral de Defensa do Monte, Manuel Rodríguez, e o director xeral de Emerxencias, Santiago Villanueva. O congreso continuará hoxe con diferentes charlas e mesas redondas con autoridades e expertos en lumes forestais tanto de Galicia como de Portugal. Onte González fixo balance dunha campaña de incendios que tivo que lidar coa intencionalidade e «un contexto climatolóxico sen precedentes» e cifrou en 2.376.000 as toneladas de C02 emitidas á atmosfera, máis que as anuais de toda a gandería galega, e o custo estimado de 78 millóns de euros.
No marco de Sedexpo levaron a cabo demostracións centradas en sistemas de extinción de incendios, equipos de excarceración, drones de seguridade e de salvamento ou un sistema que permite unha transmisión encriptada da información recollida por un dron a calquera parte do mundo vía LTE. Ao mesmo tempo desenvolvéronse talleres como un de soporte vital e desfibrilación externa semiautomática, así como presentacións de proxectos e casos de éxito xunto con reunións de xuntas directivas de diversos colectivos. A feira terá aberta as súas portas ata o sábado cun amplo programa de conferencias, con máis de 90 relatorios conducidos por preto de 130 expertos que ocuparán seis salgas durante a feira que sumará novas demostracións e simulacros.